"Milli Şura" adlı multiplikasiya

Milli.Az Trend-ın yazısını təqdim edir:

"Mili Şura" adlı qurum yarandığı gündən məhvə məhkum olub. Son olaylar isə bu məhvin labüdlüyünü daha da artırdı. Bəllidir ki, bu qurumda, daha doğrusu quramada təmsil olunanlar radikal kəsimdir. Necə deyərlər, hər şeyə tərsməssəf baxanlar, qazançadan tapança, gödəkcədən kötəkcə düzəldənlər...

Sayları çox azdır, olduqca az. Buna görə də adlarındakı "Milli" sözünə nəinki 365 gün, 365 il də yol getsələr, çata bilməzlər. Nə yazıq ki, özləri də bunu bilir, dərk edirlər, lakin şəxsi mənfəət, özəl istək və "gözəl dəstək" (xarici havadarlar nəzərdə tutulur) imkan vermir ki, tutduqları səhv yoldan əl çəksinlər, məğlub doğulduqlarını etiraf etsinlər. Amma bu radikallar artıq içdən çürüyən meyvə kimidirlər. Ağacdan, onun hansısa budağından asılı qalıblar. Bir anlığa çürük, pırsımış bir meyvənin qırılaraq ağacdan yerə necə dəydiyini düşünün! Bax, bu şura da hazırda o durumdadır.

Məlum video-multiplikasiyadan sonra içlərini başqa bir dərd götürüb. Özü də onları bu dərdə quramanın Fransadakı fırığı Qənimət Zahid salıb. Deyib ki, ayıq olun, Azərbaycanda bir qrup müxalif şəxs yeni təşkilat yaradır, siz hara baxırsız?!

Sonra əlavə edib ki, bununla bağlı "WhatsApp" qrupu yaradılıb və orada müzakirələr gedir.

Quramaların qənimətlə (Sözün digər mənasında) söhbətindən məlum olur ki, "Milli Şura"çılar yeni təşkilatın yaranmasından narahat olublar. Yəni hesab edirlər ki, yeni qurum bu şuranın zəifləməsi fonunda yaranmaqla boşluqdan istifadə etməyə çalışır.

Bu arada "boşluq" sözü quramanın qurmanı Gültəkin Hacıbəylini aqressivləşdirib və o, bu addımı "fürsətçilik" adlandırıb. Deyib ki, "onların məqsədi Əli Kərimli ilə bir masa arxasında oturmaqdır. Həmin adamlar səmimi olsaydılar, gəlib Milli Şuraya qoşulardılar. Əli bəyin yoxluğunu doldurmaq üçün Milli Şuraya gəlmək lazımdır, başqa bir göbələk təşkilat yaratmağa ehtiyac yoxdur".

Göbələk təşkilat ha... Eynən "Milli Şura"ya şamil ediləcək bir ifadə! Düşünüb tapıb, əhsən!
Digər maraqlı məqam isə odur ki, bu məsələ barədə Q.Zahidə həmin qrupda təmsil olunan sabiq səfir Arif Məmmədov məlumat çatdırıb. Buna görə də Qənimət Zahid hesab edir ki, Arif Məmmədov onun həmin qrupdakı agentidir: "Arif Məmmədov mənə dünən axşam dedi ki, istəyirəm həmin oradan çıxam, mən isə dedim ki, bəy, hələ qalmağın məsləhətdir, qal görək söhbət nələrdən gedəcək".

Bir əhsən də buna düşür, niyə də düşməsin? Filmlərdə gördüyü səhnələri real həyatda yaşamaq istəyir, lap özünü Casus filminin qəhrəmanı kimi hiss edir.

Və beləliklə, daha bir video-multiplikasiyanın sonu...

Milli.Az