Mourinyo Trent Aleksander-Arnoldla bağlı qərar verdi

"Real Madrid"in baş məşqçisi Joze Mourinyo Trent Aleksander-Arnoldun yarımmüdafiədəki performansını yüksək qiymətləndirib.

Milli.Az xarici mətbuata istinadən xəbər verir ki, ingiltərəli futbolçu UEFA Çempionlar Liqasında "İnter" üzərində 2:1 hesablı qələbə qazandıqları matçda Federiko Valverde ilə birlikdə yarımmüdafiə xəttində yer alıb.

Joze Mourinyo qarşılaşmadan sonra Aleksander-Arnoldun İngiltərə millisində və "Liverpul"da da bu mövqedə oynadığını xatırladıb. Bununla belə, portuqaliyalı mütəxəssis onun əsl yarımmüdafiəçi olmadığını vurğulayıb.

"O, yarımmüdafiədə çox yaxşı oynadı və taktiki tapşırıqları düzgün yerinə yetirdi. Lakin yarımmüdafiəçi deyil. Aleksander-Arnold və Valverde bu səviyyədə çox yaxşı iş gördülər", - deyə Mourinyo bildirib.

Futbolçunun yarımmüdafiədə meydana çıxması Eduardo Kamavinqa, Arda Güler və Bernardo Silvanın cəzalı olması ilə əlaqələndirilib. Aleksander-Arnold görüş ərzində iki qol epizodu yaradıb və komandasının ən çox cinah ötürməsi edən futbolçusu olub. Bununla yanaşı, o, top uğrunda mübarizələrin heç birində qalib gəlməyib. Futbolçunun ötürmələrinin dəqiqliyi isə 83,3 faiz təşkil edib.

Aleksander-Arnold "İnter"in 77-ci dəqiqədə fərqi azaltdığı qoldan qısa müddət sonra əvəzlənib. Joze Mourinyo onun meydanda bütün gücünü ortaya qoyduğunu qeyd edib.

"Bu mövqedə oynamaq sağ cinah müdafiəçisi olmaqdan fərqlidir. Fiziki yük və intensivlik olduqca ağırdır. O, yüz faizini verdi və meydanı bütün gücünü sərf edərək tərk etdi", - deyə baş məşqçi əlavə edib.

Portuqaliyalı mütəxəssis Aleksander-Arnoldun universallığını, ötürmələrini, cinah asmalarını və standart vəziyyətlərdəki bacarığını xüsusi qeyd edib. Buna baxmayaraq, Mourinyonun futbolçunu bundan sonra daimi olaraq yarımmüdafiə mövqeyində oynatmaq niyyətində olmadığı bildirilir.

Müəllif: Tural Hüseyn (Milli.Az redaktor)