Medvedyev Paşinyan haqqında olmazın ifadələr işlətdi

Medvedev Rusiya qazının qiymətlərini qoruyub saxlamaq istəyən, eyni zamanda isə Avropa İttifaqı ilə yaxınlaşan Ermənistan baş nazirinin siyasətini tənqid edib.

Milli.Az xəbər verir ki, Rusiya Təhlükəsizlik Şurasının sədr müavini Dmitri Medvedev Ermənistan hakimiyyətinin Avropa İttifaqı ilə yaxınlaşma kursunu tənqid edərək bildirib ki, İrəvan eyni vaxtda həm Avrasiya İqtisadi İttifaqında  iştirakın üstünlüklərini qoruyub saxlamağa, həm də Aİ ilə münasibətləri inkişaf etdirməyə çalışır.

Medvedev özünün "X"  kanalında qeyd edib ki, "iki stul arasında oturmağa çalışan kəs yerə ağrılı şəkildə yıxılmaq riski daşıyır".

"Görünən odur ki, Nikol ləqəbli bir nəfər yaxın vaxtlarda məhz bunu etməyə hazırlaşır. O, öz 'superdövlətini' israrla Avropa İttifaqına sürükləyir, eyni zamanda isə Avrasiya İqtisadi İttifaqında iştirakdan doğan bütün mənfəətləri qoruyub saxlamağa çalışır", - deyə Medvedev yazıb.

Təhlükəsizlik Şurasının sədr müavininin sözlərinə görə, Ermənistan hakimiyyəti Avropa İttifaqı ilə münasibətləri dərinləşdirsə belə, Rusiya qazının hazırkı qiymətlərini qoruyub saxlayacağına ümid edir:

"Rusiya getməkdə olan 'tərəfdaşı' üçün qazın hazırkı qiymətini - hər min kubmetr üçün 177,5 dollar səviyyəsində saxlamalıdır", - deyə o, vurğulayıb və əlavə edib ki, 2026-cı ilin may ayında Avropada qazın birja qiymətləri hər min kubmetr üçün 570-590 dollar səviyyəsində olub.

"Axı hər kəsə bəllidir ki, Avropa qaz qiymətlərinə keçid baş verərsə, 'A' ölkəsinin əhalisi bu dayını birbaşa Parisə, onun sevgi dolu dostu Makronun yanına qovacaq. Ona görə də dünyada hamının xoşuna gəlməyə çalışaraq min bir oyundan çıxmaq məcburiyyətində qalır. Amma belə şey olmur", - deyə Medvedev bəyan edib.

Bundan əvvəl, mayın 22-də Dövlət Dumasının sədri Vyaçeslav Volodin də Paşinyanın Rusiyaya qarşı siyasətini qeyri-dost addım adlandırmışdı.

"Dövlət Dumasının deputatlarının fikrincə, Ermənistanın baş naziri Paşinyan ölkəmizin təqdim etdiyi imkanlardan rəzilcəsinə istifadə edərək Rusiya Federasiyasına qarşı qeyri-dost siyasət yürüdür. BU, VİCDANSIZLIQDIR. Bütün bunları, daha əvvəl də dediyim kimi, Ukrayna nümunəsində görmüşük", - deyə Volodin qeyd etmiş və Rusiyanın Ermənistana qazı öz ziyanına tədarük etdiyini vurğulamışdı.

Ermənistanın Aİ və Kollektiv Təhlükəsizlik Müqaviləsi Təşkilatı ilə bağlı kursu
Ermənistan rəsmi şəkildə Aİ-yə üzv olmaq canatımını bəyan edib və Kollektiv Təhlükəsizlik Müqaviləsi Təşkilatında iştirakını dondurub. Mayın 5-də İrəvanda tarixdə ilk dəfə olaraq Ermənistan və Avropa İttifaqının ikitərəfli sammiti keçirilib. Bu tədbir 40-dan çox Avropa liderini bir araya gətirən Avropa Siyasi Birliyinin sammitindən dərhal sonra baş tutub.

Aprel ayında Rusiya Prezidenti Vladimir Putin Paşinyanla görüşündə xatırlatmışdı ki, Ermənistan eyni vaxtda həm Gömrük İttifaqında, həm də Avropa İttifaqında təmsil oluna bilməz.

Aprelin əvvəlində Ermənistan parlamentinin spikeri Alen Simonyan da Rusiya qazının qiymətinin artacağı təqdirdə, Ermənistanın KTMT və Aİİ-dən (Avrasiya İqtisadi İttifaqı) çıxmasının mümkünlüyünü istisna etməmişdi.

Qeyd edək ki, son dövrlər Paşinyanla bağlı tənqidi fikirlər həm ölkə daxilinində, həm də xaricdə geniş vüsət alıb. Paşinyanın seçkiqabağı kampaniyada sərgilədiyi gülünc vəziyyət onu ölkəsində və beynəlxalq aləmdə daha da gözdən salıb.

Milli.Az