Mədəniyyət

Mədinə Gülgünün ölməz misraları səhnədə yenidən canlandı – 100 illik yubiley gecəsi - (Foto)

29 Oktyabr 2026 22:37

Baxış: 102

VTB-də minimal faiz dərəcəsi ilə nağd kredit 9.9%-dən

Rəşid Behbudov adına Azərbaycan Dövlət Mahnı Teatrının təşkilatçılığı və Azərbaycan Yazıçılar Birliyinin dəstəyi ilə görkəmli Azərbaycan şairəsi Mədinə Gülgünün 100 illik yubileyinə həsr olunmuş "Mədinə Gülgün - 100" musiqili poeziya gecəsi keçirilib.

Tədbirin açılışında Xalq şairi, Azərbaycan Yazıçılar Birliyinin Güney Azərbaycan ədəbiyyatı bölməsinin sədri Sabir Rüstəmxanlı və Azərbaycan Yazıçılar Birliyinin bədii tərcümə və ədəbi əlaqələr mərkəzinin sədri, tənqidçi və esseist Əsəd Cahangir çıxış ediblər. Çıxışlarda Mədinə Gülgünün həyat və yaradıcılığının əhəmiyyəti, Azərbaycan poeziyasına verdiyi töhfələr və onun ədəbi irsinin gələcək nəsillərə çatdırılmasının vacibliyi vurğulanıb.

Mədinə Gülgün poeziyasından seçilmiş şeir nümunələri Hüseynağa Aslanov, Təhminə Hümbətova və Vüsal Rzasoyun ifasında səsləndirilib.

Konsert proqramında Rəşid Behbudov adına Azərbaycan Dövlət Mahnı Teatrının instrumental ansamblının (ansamblın rəhbəri Mirxalid Salayev) müşayiətilə teatrın solistləri Xalq artisti Gülyaz Məmmədova, Fəxri Kazım-Nicat, Aynur İsgəndərli, İlhamə Qasımova, Rövşən Qəhrəmanov və Mədinə Kazımova çıxış ediblər. Proqram tamaşaçılara zəngin bədii təəssürat bəxş edib.

"Mədinə Gülgün - 100" musiqili poeziya gecəsi Azərbaycan poeziyasına və milli-mənəvi dəyərlərimizə ehtiramın ifadəsi kimi yadda qalıb.

İnformasiya dəstəyi - Trend.Az, Day.Az, Milli.Az