Uzaq Şərq küçələrinin ulduzu: Tayland üsulu "Pad Kra Pao" resepti

Tayland küçə yeməklərinin ən populyarı olan "Pad Kra Pao" soya sousunun karamel dadı, sarımsağın ətri və təzə reyhanın xoş qoxusu ilə tavada cəmi 10 dəqiqəyə şedevr yaradır. Üzərinə əlavə olunan, kənarları xırtıldayan yağda yumurta isə bu zəngin yeməyin ən gözəl tamamlayıcısıdır.

Milli.Az lazım olan ərzaqları təqdim edir:
Qiymə: 300 qram az yağlı mal əti qiyməsi

Göyərti: 1 dəstə təzə reyhan (Orijinal reseptdə Tayland reyhanı istifadə olunur, lakin adi yaşıl reyhanla da əla nəticə alınır)

Sarımsaq: 4 diş nazik doğranmış sarımsaq

Bibər: 1-2 ədəd qırmızı acı bibər (nazik halqa şəklində doğranmış; acı sevməyənlər kapya bibərdən istifadə edə bilər)

Yağ: 2 yemək qaşığı bitki yağı

Xidmət üçün: 2 ədəd yumurta və bişmiş sadə düyü (və ya basmati düyüsü)

Uzaq Şərq sousu üçün:

3 yemək qaşığı soya sousu

1 yemək qaşığı istridyə sousu (yoxdursa, 1 qaşıq artıq soya sousu və 1 çay qaşığı bal əlavə edə bilərsiniz)

1 çay qaşığı qəhvəyi şəkər (sousun karamelizasiyası üçün)

1/4 stəkan su

Hazırlanması:
Kiçik bir qabda soya sousunu, istridyə sousunu, şəkəri və suyu hamar olana qədər qarışdırın.

Geniş bir tavada (və ya wok tavasında) yağı qızdırın. Nazik doğranmış sarımsaq və bibərləri əlavə edib yüksək odda 15-20 saniyə qovurun (sarımsaqları yandırmamağa diqqət edin).

Qiyməni tavaya əlavə edin. Qiymə öz suyunu buraxıb tam çəkənə və yüngül qızılı rəng alana qədər yüksək odda qovurun.

Hazırladığınız sousu qiymənin üzərinə tökün. Sous bir az qatılaşıb qiyməyə tam hopana qədər 2-3 dəqiqə qarışdıraraq bişirin.

Ocağın altını söndürün. Təzə reyhan yarpaqlarını bütöv şəkildə tavaya əlavə edin və qiymənin istisi ilə 1 dəqiqə ərzində solmasını gözləyin. (Reyhanı heç vaxt ocağın üzərində bişirməyin).

Başqa bir tavada yumurtaları (sarısı axıcı, kənarları xırtıldayan olacaq şəkildə) qızardın. Boşqabın altına bişmiş düyünü, üzərinə reyhanlı qiyməli qarışığı və ən üstə isə xırtıldayan yumurtanı yerləşdirərək isti-isti servis edin.

Nuş olsun!

Müəllif: Ülkər Vəliyeva (Milli.Az redaktor)