Səyyahlar kütləvi şəkildə çemodanlarına tualet kağızı qoymağa başlayıblar

Təcrübəli səyyahlar səyahət öncəsi çemodanlarına bir rulon tualet kağızı yerləşdirirlər. İlk baxışda təəccüblü görünsə də, bu üsul rütubəti azaltmaqdan tutmuş geyimləri təravətli saxlamağa, kövrək əşyaları qorumaqdan gözlənilməz ehtiyaclara qədər bir çox üstünlük qazandırır.

Milli.Az xəbər verir ki, səyahətə hazırlaşarkən çoxları geyimlərini səliqəyə salmağa, maye məhsulların axmasının qarşısını almağa və çemodanlarını mümkün qədər etibarlı şəkildə hazırlamağa çalışır. Lakin təcrübəli səyyahların illərdir tətbiq etdiyi, demək olar ki, heç bir əlavə xərc tələb etməyən maraqlı bir üsul son vaxtlar yenidən gündəmə gəlib. Mütəxəssislər çemodanın dibinə bir rulon və ya bir neçə qat tualet kağızı qoymağın yol boyu müxtəlif üstünlüklər təmin edə biləcəyini bildirirlər.

Çemodandakı artıq rütubəti çəkir
Təyyarə, avtobus və ya avtomobillə edilən uzun səyahətlərdə çemodan temperatur və rütubət dəyişikliklərinə məruz qala bilir. Bu da geyimlərdə nəmlənməyə və zamanla xoşagəlməz qoxuların yaranmasına səbəb ola bilər. Tualet kağızı isə artıq rütubəti hopduraraq geyimlərin daha quru qalmasına kömək edir. Xüsusilə tam qurumadan çemodana qoyulan dəsmal və ya geyimlərdə yarana biləcək qoxu və kif riskini azaldır.

Geyimlərə xoş qoxu bəxş edir
Təcrübəli səyyahların tez-tez istifadə etdiyi digər bir üsul isə tualet kağızına bir neçə damcı efir yağı damızdırmaqdır. Lavanda, limon, nanə və ya çay ağacı yağı kimi təbii qoxular yol boyu çemodanın içində yüngül və xoş bir ətir yayaraq geyimlərin daha təravətli qalmasına töhfə verir.

Həssas əşyaları da qoruyur
Tualet kağızı yalnız rütubətə nəzarət üçün deyil, həm də həssas əşyaları qorumaq üçün istifadə edilə bilər. Ətir şüşələri, şüşə qablar və ya hədiyyəlik əşyaların ətrafına sarılan bu kağız qatları, yol boyu baş verə biləcək zərbələrin təsirini azaldaraq qırılma riskini aşağı salır. Üstəlik, bunu edərkən çemodanda demək olar ki, heç yer tutmur.

Gedəcəyiniz yerdə də həyat qurtara bilər
Səyahət həvəskarları tualet kağızının çatdığınız məkanda da gözlənilməz hallarda işə yaraya biləcəyini deyirlər. Bəzi otellərdə, düşərgələrdə və ya kirayə evlərdə tualet kağızı olmaya bilər və ya keyfiyyəti sizi qane etməyə bilər. Bu səbəbdən bir çox insanlar çemodanda ehtiyat olaraq bir rulon saxlamağa üstünlük verirlər.

Müəllif: Ülkər Vəliyeva (Milli.Az redaktor)