Sgroppino: İtalyan limon içkisi resepti

"Sgroppino" kökləri XV əsr Venesiyasına gedib çıxan, limon sorbesi əsasında hazırlanan fərahladıcı İtalyan içkisidir. Əsrlərdir süfrələrin bəzəyi olan bu içki yeməklər arası damağı təmizləmək və ya yay günlərində sərinləmək üçün ideal seçimdir. Hazırlanması həm asan, həm də vizual olaraq çox cəlbedicidir.

Milli.Az xəbər verir ki, Venesiya dilində "sgroppà" sözü "düyünü açmaq" mənasına gəlir. Bu ad içkinin ziyafətlər zamanı mədəni rahatlatmaq və hazmı asanlaşdırmaq funksiyasına işarə edir. O dövrdə buz və qar daşınması çox bahalı olduğu üçün bu içki yalnız varlı sarayların əlçatan olduğu sofistike bir dad idi. Bu gün "Sgroppino" xüsusilə dəniz məhsulları menyularından sonra verilən yüngül bir sonluq kimi qəbul edilir.

Əsas inqrediyentlər
İçkinin dadı istifadə etdiyiniz limon sorbesinin keyfiyyətindən asılıdır.

Limon sorbesi: Hazır da ala bilərsiniz, lakin evdə təzə limondan hazırlanan sorbe çox daha zəngin bir aroma verir.

Qazlı su: Soyuq qazlı su (və ya qazlı mineral su) sorbenin intensivliyini tarazlayır və içkiyə yüngüllük qatır.

Tamamlayıcılar: Təzə nanə yarpaqları və nazik doğranmış limon dilimləri həm görüntü, həm də ətir üçün əvəzsizdir.

4 nəfərlik hazırlanma qaydası
İnqrediyentlər:

400 qram limon sorbesi

300 ml soyuq qazlı su (və ya mineral su)

1 ədəd limon (nazik halqa doğranmış)

Təzə nanə yarpaqları

İstəyə görə buz

Hazırlanması:

Stəkanları soyudun: Xidmət kədəhlərini əvvəlcədən soyuducuda saxlayın ki, içki uzun müddət sərin qalsın.

Sorbeni yumşaldın: Sorbeni dondurucudan çıxardıqdan 5-10 dəqiqə sonra kiçik bir çırpıcı ilə yüngülcə yumşaldın.

Qazlı suyu yavaş və dairəvi hərəkətlərlə sorbiyə qarışdırın. Qabarcıqların sönməməsi üçün çox sürətli və güclü qarışdırmayın.

Qarışığı kədəhlərə paylayın, üzərinə limon dilimi və nanə yarpağı əlavə edib dərhal servis edin.

Evdə limon sorbesi hazırlamaq
250 ml su ilə 200 qram şəkəri qaynadıb şərbət hazırlayın. Soyuduqdan sonra üzərinə 180 ml təzə limon suyu və iki limonun rəndələnmiş qabığını əlavə edin. Qarışığı dondurma aparatında və ya dondurucuda hər saat başı çatalla qarışdıraraq 4-5 saat ərzində dondurun. İncə qabıqlı, yetişkin limonlar daha çox su və aroma verdiyi üçün daha yaxşıdır.

Fərqli variasiyalar
Qreypfrut sorbesi: Daha meyvəli və şirin bir dad verir; çəhrayı qreypfrut xüsusilə gözəl rəng qatır.

Moruq və limon: Moruq püresi limon sorbesi ilə mükəmməl uyğunlaşır, şirin-turş balansı yaradır.

Nanə və xiyar: İçəriyə incə doğranmış xiyar və nanə əlavə etmək onu ən ferahladıcı yay içkisinə çevirir.

"Sgroppino" sadəcə bir resept deyil, əsrlərdir dəyişməyən bir İtalyan mədəniyyətidir. Evdə hazırladığınız zaman bu sadəlik və keyfiyyət qonaqlarınız üçün çox xüsusi bir ikrama çevriləcək. Ölçülərin dəqiq olması (mətbəx tərəzisindən istifadə etmək tövsiyə olunur) içkinin mükəmməl tarazlığını təmin edəcək.

Müəllif: Ülkər Vəliyeva (Milli.Az redaktor)