Kobud sayılan bu 7 davranış əslində yüksək zəka əlamətidir

Cəmiyyətdə "nəzakətli" və "hər kəslə razılaşan" insanların duyğusal zəkasının (EQ) yüksək olduğu düşünülür.

Milli.Az xəbər verir ki, klinik psixoloq Dr. Martinə görə, yüksək EQ-ya sahib fərdlər öz sərhədlərini qorumaq üçün bəzən kənardan "soyuq" və ya "kobud" görünən davranışlar sərgiləyirlər.

Əslində yüksək zəka əlaməti olan həmin 7 davranış:

"Yox" deməkdəki qətiyyət
Cəmiyyətdə "yox" demək çox vaxt eqoistlik kimi qəbul edilir. Lakin yüksək EQ-lu insanlar başqalarına kömək etməzdən əvvəl öz duyğusal enerjilərini yoxlayırlar. Sərhəd qoymaq onların tükənməsinin qarşısını alır və münasibətləri daha sağlam zəmində saxlayır.

Məclislərdən və ortamlardan erkən ayrılma
Bir tədbirdən tez gedən biri "nəzakətsiz" damğası ala bilər. Əslində isə bu, "özünə qayğının" ən saf halıdır. Sosial enerjisinin bitdiyini anlayan zəkalı fərd, orada qalıb saxta davranmaqdansa, dürüstcə ayrılmağı seçir.

Tək dəfəlik və konkret üzrlər
Hər şeyə görə dəfələrlə üzr istəmək nəzakət deyil, asılılıq əlaməti ola bilər. Yüksək EQ-lu şəxslər "üzr inflyasiyasına" girmirlər. Onlar bir dəfə səmimi şəkildə üzr istəyir və mövzunu bağlayırlar. Bu, soyuqluq deyil, yetkinlikdir.

Duyğusal anlarda "reaksiyasızlıq"
Gərgin mübahisə zamanı dərhal reaksiya verməyən biri "laqeyd" sanıla bilər. Halbuki bu insanlar duyğusal fırtınanın ortasında tarazlığı qorumağa çalışırlar. Onların susması vəziyyəti analiz edib ən doğru cavabı vermək üçün keçən düşünmə müddətidir.

Fikir dəyişmə çevikliyi
Dünən dediyinin bu gün əksini müdafiə edənə "qərarsız" deyirlər. Psixologiyada isə bu, "koqnitiv çeviklik" adlanır. Yeni məlumatlar işığında fikrini dəyişmək, insanın tənqidi təfəkkürə sahib olduğunu və özünü yeniləyə bildiyini göstərir.

Münasibətlərdə "aşırı seçicilik"
Dost və ya tərəfdaş seçimində çox titiz davranmaq kənardan "təkəbbürlü" görünə bilər. Lakin yüksək EQ-lu şəxslər səthi tanışlıqlar yerinə, öz dəyərlərinə uyğun gələn, dərin və təhlükəsiz bağlar axtarırlar.

Təəccüblü dərəcədə birbaşa ünsiyyət
Dürüstlük dozası artdıqda bu, qarşı tərəfi narahat edə bilər. Lakin bu, manipulyasiyadan qaçmaq və vaxt itirməmək istəyinin nəticəsidir. Onlar həqiqəti bəzəmədən deməyin uzunmüddətli perspektivdə daha faydalı olduğunu bilirlər.

Lalə Qüdrətova
Milli.Az