Belə məşq heç bir işə yaramır - Mif imiş

Göz gimnastikasının görmə qabiliyyətini bərpa etməsi ilə bağlı fikirlər elmi baxımdan doğru deyil.

Milli.Az xəbər verir ki, bunu rusiyalı oftalmoloq Angelina Kazantseva bildirib. Onun sözlərinə görə göz üçün edilən məşqlər görmənin zəifləməsinin əsas səbəblərini aradan qaldıra bilmir.

Həkimin sözlərinə görə, miopiya (yaxıngörmə), hipermetropiya (uzaqgörmə), astiqmatizm kimi problemlər gözün anatomik quruluşu ilə bağlıdır. Bu pozuntular göz almasının uzunluğu, buynuz qişanın və ya büllurun əyriliyi ilə əlaqəlidir. Göz əzələ olmadığı üçün onu məşqlə "formaya salmaq" mümkün deyil. Eyni yanaşma yaşa bağlı presbiopiyaya, yəni yaşlılıq uzaqgörməsinə də aiddir. Bu, büllurun sərtləşməsi ilə gedən təbii prosesdir.

Mütəxəssis qeyd edib ki, göz məşqlərinə həddindən artıq ümid bəsləmək bəzən təhlükəli də ola bilər. Belə ki, insanlar bu üsullara güvənərək həkimə müraciəti gecikdirə, nəticədə vəziyyəti daha da ağırlaşdıra bilərlər.

Kazantseva vurğulayıb ki, göz gimnastikasının əsas rolu müalicə deyil, profilaktika və görmə yorğunluğunun azaldılmasıdır. Uzun müddət ekrana və ya kitaba baxdıqda göz əzələləri gərgin vəziyyətdə qalır. Bu isə gözlərdə quruluq, "qum hissi", baş ağrısı və görmənin müvəqqəti bulanması ilə nəticələnə bilər. Məşqlər qan dövranını yaxşılaşdırmağa, "quru göz" sindromunun qarşısını almağa və akkomodasiya spazmını, yəni yalancı miopiyanı azaltmağa kömək edə bilər.

Həkimin sözlərinə görə, gözlər üçün ən effektiv istirahət üsulu uzağa baxmaqdır. Məsələn, pəncərədən çölə, təbiət mənzərələrinə baxmaq gözləri daha yaxşı rahatladır. Gimnastika isə yalnız köməkçi vasitə sayılmalıdır.

Eyni zamanda, yüksək dərəcəli miopiya, torlu qişanın qopması və ya qlaukoma kimi ciddi problemləri olan şəxslərə göz məşqlərinə başlamazdan əvvəl mütləq həkimlə məsləhətləşmək tövsiyə olunur.

İsmayıl
Milli.Az