Suvarma imkanları yaxşılaşdırılır - VİDEO

Masallıda əkin sahələrinin su ilə təminatı üçün zəruri işlər görülür

Milli.Az Real TV-ə istinadən bildirir ki, hər il suvarma mövsümü may ayında başlayırdısa, quraqlıq olduğundan bu il mövsümə aprel ayının 15-dən start verilib.

Masallıda 25 min hektara qədər əkinə yararlı münbit torpaqdan 17 min hektarı əkilib. Viləşçay su anbarı rayonun 9892 hektar əkin sahəsini suvarma suyu ilə təmin edir. Su anbarının faydalı həcminin artırılması və hazırki su tutumunun 3 mislinə çatdırılması məqsədilə 2-ci növbəsinin tikilməsi nəzərdə tutulub. Cənab Prezidentin sərəncamı ilə ölkə ərazisində 10 böyük su anbarlarının tikintisi başlanmalıdır.

 Viləşçay su anbarının istismar idarəsinin baş mühəndisi Rusif Kərimov:
"Bu gördüyünüz Viləşçay su anbarının 1-ci növbəsidir. 2-ci növbəsinin tikilməyinə də cənab Prezidentin sərəncamı var, inşallah yaxın vaxt ərzində başlanılmalıdır. Hazırda Viləşçay su anbarının 1-ci növbəsi 46 milyon kubmetr su tutma qabiliyyətinə malikdir. 2-ci növbə nəzərdə tutulmuşdur ki, 128 milyon kubmetr su tutma qabiliyyətinə malik olacaqdır. Bununla həm Masallı rayonunda ümumi 17000 hektara yaxın əkin sahəsi suvarma suyu ilə təmin olunacaq, birinci növbədə 9892 hektardır, 2-ci növbədə artıq 17000 hektar Masallı rayonunda əkin sahəsi var ki, yararlı torpaqlar suvarma suyu ilə təmin olunacaq. Qonşu Cəlilabad və Neftçala rayonları da nəzərdə tutulub ki, Viləşçay su anbarının 2-ci növbəsi tikildikdən sonra su verilsin".

Bundan başqa dövlət başçısının sərəncamına uyğun olaraq əkin sahələrinin suvarma suyu ilə təminatını yaxşılaşdırmaq üçün rayonun müxtəlif ərazilərində mövcud 37 ədəd kiçik sututarlarda təmir-bərpa işləri aparılaraq istismara verilib. Görülən işlər nəticəsində rayonda daha 8 milyon kubmetr su ehtiyatı yaradılacaq ki, bununla 3 min hektara qədər əkin sahəsinin suvarılması təmin olunacaq. Bu il quraqlıq olduğuna görə Viləşçay su anbarı tam dolmasa da, 38 milyon kubmetrə qədər su yığılıb. Ən çox suvarılan isə çəltik sahələridir. Keçən il 300 hektar sahədə çəltik əkilib. Fermerlərin sudan qənaətlə istifadə etməsi də vacib məsələlərdəndir. Rayonun Şərəfə kənd sakini Rafət Abbasov 15 hektardan çox torpaq sahəsində müxtəlif tərəvəz bitkiləri əkib becərir. Hazırda 5 hektar ərazidə saldığı çiyələk sahəsində becərmə işləri aparılır. Fermerin dediyinə görə, suvarma baxımından heç bir çətinlikləri yoxdur.


Aprel ayında mütəmadi olaraq su meliorasiya idarəsi bizi suyla təmin eləyir. Bu yaxınlarda prezidentimizin dediyi kimi də su qıtlığı ilə əlaqədar biz fermerlər də çalışırıq ki, üstümüzə düşən öhdəliyi, yəni sudan qənaətlə istifadə eləyək. Bu günləri görürsünüz damcı üsuluna keçmişik, müasir tipli damcı üsuludur. Bu üsulla istifadə olunacaq suya, əvvəlki ilə indikində 70 faiz suya qənaət eləyirik.

Bəndlərin, stansiya və hidrotexinki qurğuların sazlığı diqqətdə saxlanılır, suvarma kanallarına suyun verilməsi, sel və daşqın sularının maneəsiz ötürülməsi üçün selötürücü kanallarda təmizləmə həyata keçirilir, dambalar möhkəmləndirilir.

Viləşçay su anbarının istismar idarəsinin baş mühəndisi Rusif Kərimov:
"Sağ sahil beton kanalında təmir işləri aparılmış, 300 metrə yaxın beton üzlüklə üzlənmişdir. Bundan əlavə də suvarma mövsümü olduğuna görə, hal-hazırda su verildiyinə görə, iş görə bilmədiyimizdən suvarma mövsümü dayandıqdan sonra yenə təkrarən işlər davam etdiriləcəkdir. Sol sahil torpaq kanalları Masallı rayonunda ümumilikdə 337 km-dir. Bunun 114 km-i təsərrüfatlararası, qalan 223 km-i təsərrüfatdaxilidir. Bu 114 km-i təsərrüfatlararası torpaq kanallarının 35 km-də lildən təmizlənmə işləri aparılmışdır".

Selin qarşısını almaq, əhalinin yaşadığı məntəqələrin su altında qalmaması üçün sahil-bərkitmə işləri də aparılıb.

Qeyd edək ki, Masallıdan 8-dən artıq böyük çay keçir və bu il çaylarda sel, daşqın olmayıb.

Milli.Az