Mədəniyyət

Opera və Balet Teatrında "Eşq və Ölüm" baletinin tamaşası keçiriləcək

18 Yanvar 2020 17:34
Baxış: 1 056

Fevralın 6-da Azərbaycan Dövlət Akademik Opera və Balet Teatrında Azərbaycanın Xalq Artisti, professor, diplomat, görkəmli ictimai xadim Polad Bülbüloğlunun 75 illik yubileyi münasibətilə bəstəkarın "Eşq və Ölüm" baletinin tamaşası keçiriləcək.

İlk dəfə bu balet Azərbaycan Dövlət Opera və Balet Teatrında 2005-ci ildə Vyana Balet akademiyasının professoru Vakil Usmanov tərəfindən səhnəyə qoyulmuşdur. "Kitabi Dədə Qorqud" eposunun  motivləri əsasında qələmə alınan  balet əbədi məhəbbəti tərənnüm edir, qəhrəmanların şücaət və igidliyi qarşısında ölümün gücsüz olduğunu nümayiş etdirir. Bakıda çox böyük uğurla baş tutan premyera tamaşasından sonra balet elə həmin ildə Moskvada - Rusiya Akademik Böyük Teatrı  və Sankt-Peterburqun Mariinski adına Teatrının səhnəsində nümayiş olunmuşdu.

2015-ci ildə Azərbaycan Dövlət Akademik Opera və Balet Teatrında rusiyalı xoreoqraf Nadejda Malıgina "Eşq və Ölüm" baletini yeni quruluşda  səhnəyə qoymuşdu.  Bu quruluş Polad Bülbüloğlunun 70 illik yubileyi günlərində nümayiş  olunmuşdu.  Fevralın 6-da tamaşaçılar məhz N.Malıginanın  quruluşunu izləyəcəklər.  Tamaşanı  Opera və Balet Teatrının baş dirijoru, Əməkdar artist, dirijorların beynəlxalq müsabiqələrinin və "Humay" milli mükafatının  laureatı Əyyub Quliyev idarə edəcəkdir.

Balet tamaşasında əsas partiyaları  Əməkdar artistlər Cəmilə Kərimova (Baycan), Makar Ferştandt (Yalıncıq), Samir Səmədov (Məlik xan),  Xalq artisti Gülağası Mirzəyev (Qazan xan), solistlər Timur Oduşev (Azər), Ayan Eyvazova (Ölüm) və b. ifa edəcəklər.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.