Dövlət Uşaq Filarmoniyasında Üzeyir Hacıbəyli XVIII Beynəlxalq Musiqi Festivalı çərçivəsində növbəti konsert proqramı keçirilib - (Foto)

Azərbaycan Dövlət Uşaq Filarmoniyasında Üzeyir Hacıbəyli XVIII Beynəlxalq Musiqi Festivalı çərçivəsində növbəti konsert proqramı keçirilib. 

Konserti izləyənlər arasında Azərbaycan Respublikasının mədəniyyət naziri Adil Kərimli, Heydər Əliyev Fondunun nümayəndəsi, Ailə, Qadın və Uşaq Problemləri üzrə Dövlət Komitəsinin əməkdaşı, eləcə də Fransa və Moldova səfirliklərinin nümayəndələri və digər rəsmilər olub. 

Artıq ikinci ildir ki, Üzeyir Hacıbəyli Beynəlxalq Musiqi Festivalında çıxış edən Azərbaycan Dövlət Uşaq Filarmoniyası uşaqların  ifasında milli musiqi irsimizi səhnəyə daşıyaraq bu mötəbər musiqi bayramının iştirakçısı olmaqda davam edir. 

Dahi bəstəkar Üzeyir Hacıbəylinin zəngin musiqi irsindən seçilmiş əsərlər Uşaq Filarmoniyasının solistlərinin ifasında konsertə xüsusi rəng qataraq proqramın bədii bütövlüyünü və özünəməxsus ovqatını tamamlayıb. Uşaqların Üzeyir bəyin yaradıcılığına özünəməxsus yanaşması, onun əsərlərinin ruhunu və mahiyyətini duyaraq səhnədə təqdim etmələri dahi bəstəkarın sənətinə bəslədikləri dərin ehtiramın və sevginin ifadəsidir. 

Konsert proqramı Azərbaycan Dövlət Uşaq Filarmoniyasının foyesində Filarmoniyanın solistləri, Uşaq-Gənclər Xalq Çalğı Alətləri Orkestri (bədii rəhbər: Xalq artisti Ağaverdi Paşayev), Uşaq Xor Kapellası (bədii rəhbər: Əməkdar artist Naala Barateliya) və xanəndəlik sinfinin (müəllim Elburus Niftəliyev) çıxışları ilə başlayıb.

Dahi bəstəkarın müəllifi olduğu Azərbaycan Respublikasının Dövlət Himni Uşaq-Gənclər Xalq Çalğı Alətləri Orkestri və Uşaq Xor Kapellasının ifasında təntənəli, əzəmətli səslənişiylə konsert proqramını açıb. Daha sonra bəstəkarın "Leyli və Məcnun" operasıdan "Şəbi-hicran" xoru, Səid Rüstəmovun "Qaytağı", Süleyman Ələsgərovun "Poema" əsərləri, Arif Məlikov, Dadaş Dadaşovun xalq çalğı alətləri orkestri üçün süitalarından hissələr və "Qarabağ şikəstəsi" ifa olunub. 

Proqramın II hissəsi Azərbaycan Dövlət Uşaq Filarmoniyasının konsert zalında davam edib. İstedadlı solistlərin ifasında Azərbaycan bəstəkarlarının bir-birindən maraqlı və ifaçılıq baxımından peşəkar əsərləri fortepiano, violin, fleyta, balaban və qanun alətlərinin ifasında, eləcə də vokal nömrələri ilə tamaşaçılara təqdim olunub. 
Konsert proqramında instrumental ifalarla yanaşı, rəngarəng xoreoqrafik lövhələrdən ibarət nömrələr tamaşaçıların marağına səbəb olub. Proqramın xüsusi məqamlarından biri isə Azərbaycan Dövlət Uşaq Filarmoniyasında daim diqqət mərkəzində olan, öz istedad və bacarıqları ilə seçilən xüsusi qayğıya ehtiyacı olan uşaqların çıxışları idi. Onların səhnədə nümayiş etdirdikləri ifalar konsert proqramına xüsusi rəng qatıb. 

Konsertin sonunda mədəniyyət naziri Adil Kərimli ifaçılarla görüşərək onları uğurlu ifa münasibəti ilə təbrik edib, fəaliyyətlərində uğurlar  arzulayıb.