Mədəniyyət

Sevdiyi qadını 13 il gözləyən Şərqin Çarli Çaplini - 8 fakt

2 Yanvar 2020 13:00
3 Şərh     Baxış: 1 858
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Bu gün görkəmli aktyor Lütfəli Abdullayevin (1914-1973) anım günüdür.

Milli.Az kult.az-a istinadən Lütfəli Abdullayevlə bağlı 8 faktı təqdim edir:

1. Deyilənə görə, Lütfəli Abdullayev ömrünün sonuna kimi nə Azərbaycan, nə də rus dilində yazmağı bacarıb. Yalnız ərəb əlifbasını bilib. Rollarını isə həyat yoldaşı Sevda Pepinovanın köməyi ilə öyrənirdi.

2. Mərhum sənətkarın həyat yoldaşı Sevda Pepinova Azərbaycan Xalq Cümhuriyyəti Parlamenti sədrinin müavini Həsən bəy Ağayevin nəvəsi, ilk Əmək naziri Əhməd bəy Pepinovun qızı idi. Qayınanası Xurşid Ağayeva isə Azərbaycanın ilk musiqişünas xanımı olub.

3. L.Abdullayev həyat yoldaşını düz 13 il gözləyib və nəhayət, qızın ailəsi onların izdivacına razı olub.

4. Onun kinoda ilk və son dərəcə uğurlu işi Rza Təhmasibin 1945-ci ildə lentə aldığı "Arşın mal alan" filmində Vəli rolu olub. Aktyor bu rola görə 1946-cı ildə Stalin mükafatına (sonralar "SSRİ Dövlət mükafatı" adlandı) layiq görülüb.

5. Aktyorun qanında şəkər tapılıb və həkim ona pəhriz saxlamağı tapşırıb. O isə həkimə bu cavabı verib: "Onsuz da öləcəm, qoy heç olmasa tox ölüm".

6. L.Abdullayev ölümündən bir neçə saat əvvəl xalq şairi Bəxtiyar Vahabzadəyə zəng edib. Elə bil ölümünü əvvəldən duyan aktyor şairə deyib: "Bəxtiyar, rəhmətlik atan Mahmudun yanına gedəcəm, sözün varsa de, çatdırım".

7. "Şərqin Çarli Çaplini" adlandırılan Lütfəli Abdullayev 1973-cü il dekabrın 9-da - həyat yoldaşı Sevdanın doğum günündə vəfat edib.

8. Sənətkarın qızı Xurşid Abdullayeva Abdullayevlər nəsli ilə bağlı bir faktı açıqlayıb: bu nəslin nümayəndələri az ömür yaşayıblar, heç 60 yaşı haqlamayıblar.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.