Sahib Paşazadəyə Özbəkistanda “Sənətşünaslıq üzrə fəlsəfə doktoru (PhD)” elmi dərəcəsinin diplomu təqdim edilib - FOTO

Özbəkistanın paytaxtı Daşkənd şəhərində keçirilən "Musiqi təhsili: qlobal miqyasda vahid platformaya doğru" mövzusunda beynəlxalq forum çərçivəsində Yunus Rəcəbi adına Özbək Milli Musiqi Sənəti İnstitutunda təşkil edilən "Özbəkistan milli musiqi sənətində yeni tendensiyalar və innovativ proseslərin inteqrasiyası" adlı beynəlxalq elmi-praktik konfransda Sahib Paşazadəyə "Sənətşünaslıq üzrə fəlsəfə doktoru (PhD)" elmi dərəcəsinin diplomu təqdim edilib.

İnstitutun rektoru, professor Eldor Shermanov tarzəni təbrik edərək bildirib ki, Özbəkistan Respublikası Ali Attestasiya Şurasının 8 may 2026-cı il tarixli iclasının 385-1 saylı qərarına əsasən tarzənə elmi dərəcə verilmişdir. Rektor diplomu təqdim edərkən qeyd edib ki, Sahib Paşazadə institutun tarixində elmi dərəcə alan ilk xarici dissertantdır. Diqqətə çatdırıb ki, bu elmi müdafiənin əlamətdar tərəflərindən biri də tarzənin Azərbaycandan Özbəkistanda elm sahəsində müdafiə edən ilk alət ifaçısı olmasıdır.

Sahib Paşazadə ilk növbədə qardaş Özbəkistan dövlətinə, Yunus Rəcəbi adına Özbək Milli Musiqi Sənəti İnstitutunun rektoru Eldor Şermanova, elmi rəhbərinə və əməyi keçən hər kəsə təşəkkür edərək qeyd edib ki, bu uğur eyni zamanda Azərbaycan ilə Özbəkistan arasında illərə söykənən qardaşlıq, dostluq münasibətlərinin parlaq təcəssümüdür.Tarzən vurğulayıb ki, gələcək fəaliyyətində də hər iki ölkə arasında mədəniyyət və təhsil sahələrində əməkdaşlığın daha da möhkəmlənməsi naminə bütün bilik və bacarıqlarını əsirgəməyəcək.

Məlumat üçün bildirmək istərdik ki, Beynəlxalq Muğam Mərkəzinin direktoru, Əməkdar artist, Özbəkistanın Mədəniyyət Səfiri Sahib Paşazadə cari ilin mart ayının 18-də Özbəkistanda, Yunus Rəcəbi adına Özbək Milli Musiqi Sənəti İnstitutunda elmlər doktoru Azatgül Tashmatovanın elmi rəhbərliyi ilə "Tar üçün yazılmış əsərlərdə muğamdan istifadə məziyyətləri" mövzusunda dissertasiya işini uğurla müdafiə edib.

Milli.Az