Azərbaycan Respublikasının Əməkdar artisti Tamilla Xudayarovanın yubiley konserti - FOTO

Azərbaycan Respublikasının Əməkdar artisti Tamilla Xudayarovanın yubiley konserti möhtəşəm və rəngarəng proqramla keçirildi. Sənətkarın uzun illərə söykənən yaradıcılıq yoluna həsr olunan bu gecə musiqi, vokal və rəqs nömrələrinin harmoniyası ilə dinləyicilərə unudulmaz anlar bəxş etdi.

Konsert proqramı P.Çaykovskinin "Qu gölü" baletindən Vals ilə açıldı.Bu ifanı Sənət Uşaq Musiqi və İncəsənət Mərkəzinin kollektivi təqdim etdi. Ardınca Ü.Hacıbəylinin "Arazbarı" əsəri Q.Qarayev adına Azərbaycan Dövlət Kamera Orkestrinin ifasında səsləndi.

Gecənin vokal bölməsi Azərbaycan Milli Konservatoriyasının baş müəllimi, Əməkdar artist Zenfira İsmayılovanın milli vokal ixtisası üzrə tələbələrinin çıxışları ilə davam etdi. Bölmə T.Quliyevin "Sevinc mahnısı" ilə Əməkdar artist Firuzə İbadova və ümumi tələbə heyətinin birgə ifası ilə yekunlaşdı. Konsertmeystrlər Vəfa Əzizova və Rəhimə Qurbanovanın müşayiəti ilə təqdim olunan nömrələrdə Azərbaycan və Avropa bəstəkarlarının əsərləri səsləndi.

Konsert çərçivəsində yubilyar müxtəlif qurumlar və tanınmış sənət xadimləri tərəfindən təbrik olundu. ADKT-nın təqdim etdiyi rəqs sürprizi də dinləyicilər tərəfindən maraqla qarşılandı. Daha sonra "Özbək", "Moldova", "Rus", "Macar", "Gürcü", "Türk", Amerika" və s. xalqlarının rəqsləri təqdim olundu. Bu hissədə Bakı şəhəri 3 nömrəli Uşaq Gənclər İnkişaf Mərkəzinin "Azəri inciləri" rəqs qrupu, "Təbəssüm" Uşaq Musiqili Teatrının rəqs qrupu, Azərbaycan Milli Konservatoriyası nəzdində İncəsənət Gimnaziyasının rəqs qrupu, Bakı şəhəri 5 nömrəli Uşaq Gənclər İnkişaf Mərkəzinin rəqs qrupu, F.Əmirov adına Əməkdar Kollektiv Azərbaycan Dövlət Mahnı və Rəqs Ansamblı (baletmeyster Ceyhun Qubadov), Azərbaycan Dövlət Uşaq Filarmoniyasının rəqs qrupu, Bakı şəhəri Q.Qarayev adına Mərkəzi İncəsənət Məktəbinin rəqs qrupu, eləcə də solist Solmaz Əsgərovanın çıxışları yer aldı.

Rəqs bölməsinin və konsertin möhtəşəm kulminasiyası Azərbaycan Dövlət Rəqs Ansamblının (baş baletmeyster Rüfət Xəlilzadə) ifasında səslənən Vasif Adıgözəlovun "Azərbaycan süitası" oldu.

Konsert yüksək emosional notlarla başa çatdı.

İnformasiya dəstəyi - Trend.Az, Day.Az, Milli.Az