Ölkə

Bakıda piyadalar üçün ölüm keçidi - FOTO

1 İyun 2017 11:45

2 Şərh Baxış: 8 822

#YOL #OXUCU MƏKTUBLARI #NƏQLİYYAT #YOL POLİSİ #PİYADA #ŞİKAYƏT

Bakı sakini Vüqar Şəfiyev Milli.Az-a müraciət edərək Xətai rayonunda yolda piyadalar üçün yaranmış təhlükəli vəziyyət barədə məlumat verib:

"Xətai rayonu, Neapol dairəsinə çatmamış (Neapol küçəsi 110), yolda piyada keçidinin olduğunu bildirən zolaqlar (zebra) silinib. İnsanlar o yoldan keçərkən təhlükəli vəziyyətlə üzləşirlər. Həmçinin avtomobillər zolağı görə bilmədikləri üçün piyadalara yol vermirlər.

Xahiş edirəm, təhlükəni aradan qaldırmaq üçün müvafiq qurumlar tədbir görsünlər".

Məsələ ilə bağlı "Azəravtoyol" ASC-yə müraciət etdik. Qurumun mətbuat xidmətinin rəhbəri Anar Nəcəfli Milli.Az-a bildirib ki, yollarda hərəkətin təhlükəsizliyinin təmin edilməsi məsələsi birbaşa yol polisinə aid olduğundan bu şikayət də Bakı Şəhər Dövlət Yol Polisi İdarəsinə ünvanlamalıdır. Yalnız DYP İdarəsi məsələyə baxıb müvafiq rəy verəndən sonra onlar yolda zolaqların çəkilməsini problemsiz həyata keçirə bilərlər.

Problemlə əlaqədar Bakı Şəhər Dövlət Yol Polisi İdarəsinə də müraciət etdik. İdarənin bölmə rəisi Vaqif Əsədov deyib ki, məsələ ilə bağlı gün ərzində cavab veriləcək.

Yusif Nəsirli
Milli.Az

Digər maraqlı xəbərlər Milli.Az-ın Facebook səhifəsində