"Kazım Kaşifoğlu" ifadə verdi - (Foto)

Türkiyədə 2011-ci ildə Silivri həbsxanasında vəfat edən Milli Kəşfiyyat Təşkilatının (MİT) keçmiş əməkdaşı Kaşif Kozinoğlunun şübhəli ölümü ilə bağlı istintaq davam edir. İstintaq çərçivəsində Kozinoğlundan ilhamlandığı iddia edilən, "Kurtlar Vadisi Pusu" serialında "Kazım Kaşifoğlu" obrazını canlandıran aktyor Sedat Savtak "məlumatlı şəxs" qismində ifadə verib.

Milli.Az oxu.az-a istinadən xəbər verir ki, Sedat Savtak Silivri Ədliyyəsindəki ifadəsi təxminən iki saat davam edib.

"Yüzlərlə, minlərlə digər aktyor həmkarımla birlikdə, onların çoxu da dostlarımdır, bu obrazları canlandırmışıq və əlimizdən gələn ən yaxşı aktyorluğumuzu nümayiş etdirmişik. Hörmətli prokuror, əlbəttə ki, zəruri sualları verdi, mən də lazımi cavabları verdim. Onunla görüşüm, təbii ki, aramızda qalacaq. Bilmirdim. Belə bir obraza gəldikdə, ilk növbədə, biz ilkin mərhələdə müqaviləni imzaladığımız zaman rolun məzmunu və ya hansı istiqamətdə inkişaf edəcəyinə dair məlumat almırıq. Bunlar tamamilə ssenari ilə birlikdə inkişaf edəcək və ictimaiyyətin izləməsi əsasında yazılacaq mövzulardır. Biz müqaviləmizi alırıq və bu müqavilənin tələblərini yerinə yetirməliyik", - deyə aktyor bildirib.

Sedat Savtak o dövrdə ssenari, ssenaristlər və ya prodüserlər barədə hər hansı bir şübhəsinin olub-olmadığına dair sualı da cavablandırıb.

"Xeyr, belə bir şey müşahidə etməmişəm. Mənim məlumatlarım mənə verilən ssenaridə nə yazılırsa və mənə necə təqdim edilirsə, çəkiliş meydançasında mən də bunu aktyorluğumla yerinə yetirdim. Belə məlumatlar bizə verilmir, təxəyyül məhsuludurmu və ya hansı mənbədən qaynaqlanır, bunu bilmirik", - deyə o qeyd edib.

Qeyd edək ki, 2011-ci ildə Silivri həbsxanasında vəfat edən keçmiş MİT əməkdaşı Kaşif Kozinoğlunun ölümü ilə bağlı daha əvvəl də "Kurtlar Vadisi Pusu" serialı nəzarətə götürülüb, serialın ssenaristləri isə "məlumat sahibi" qismində ifadəyə çağırılıblar.

Prokurorluğun diqqətini cəlb edən məqamlardan biri "Kurtlar Vadisi Pusu" serialının 2011-ci il noyabrın 10-da yayımlanan 136-cı bölümü olub.

Həmin bölümdə "Kazım Kaşifoğlu" adlı obrazın hücrədə saxlanıldığı və daha sonra ölümlə hədələndiyi səhnələr nümayiş olunub.

Kaşif Kozinoğlu isə məhz həmin bölümün yayımlanmasından iki gün sonra - 2011-ci il noyabrın 12-də Silivri Cəzaçəkmə Müəssisəsində dünyasını dəyişib.

Müəllif: Ülkər Vəliyeva (Milli.Az redaktor)