Köçəryan Azərbaycana məlumat ötürüb: 100 əsgər…

Robert Köçəryan Azərbaycan tərəfinə məlumat sızdırılmasını təşkil edib və bundan sonra təxminən 100 erməni əsgəri tələyə düşərək Azərbaycan qüvvələri tərəfindən məhv edilib.

Milli.Az xəbər verir ki, bu barədə "Minval Politika" məlumat yayıb.

"Ermənistanda seçkiqabağı cəhənnəm qaynayır. Əllərində avtomat olan maskalı şəxslər artıq Nikol Paşinyanı açıq şəkildə ölümlə hədələyirlər. Heç kim zəmanət verə bilməz ki, bu ölkə seçki günü və dərhal sonra partlamayacaq. Ermənistan cəmiyyətində siyasi terror ənənələri çox dərindir. Terrorçulara abidələr ucaldılır, küçələr və hərbi təhsil müəssisələri onların adlarını daşıyır. Bundan əlavə, Ermənistan siyasi sinfi heç vaxt terroru özlüyündə siyasi mübarizə metodu kimi pisləməyib. Lakin bu gün bu çürümənin əsas mənbəyi, bir erməni dissidentin sözləri ilə desək, keçmişdə ilişib qalmış təsadüfi radikallar deyil. Bu, revanşist düşərgəsinin başında duran terrorçu Robert Köçəryandır. Qanın faciə deyil, həmişə bir vasitə olduğunu göstərən insan. Köçəryan mahiyyət etibarilə terrorçudur. O, hakimiyyəti ələ keçirmək və onu saxlamaq üçün bir çay qədər qan axıtdı. Hələ 1992-ci ildə Köçəryanın Qarabağ separatçılarının ilk "liderlərindən" biri olan Artur Mkrtçyanın qətlində iştirak etdiyi barədə davamlı şayiələr yayılmışdı. Beləliklə, Robert Sedrakoviç "İrəvana hücum etmək" üçün əvvəlcə Xankəndidə hakimiyyətə gedən yolunu təmizlədi.

1997-1998-ci illərdə Köçəryan Ermənistanın ilk prezidenti Levon Ter-Petrosyanın hakimiyyətdən uzaqlaşdırılması ilə nəticələnən "sürünən çevriliş"in əsas iştirakçılarından biri idi. Həmin "sürünən çevriliş" bir sıra siyasi sui-qəsdlərlə müşayiət olunmuşdu və İrəvanın hər küncündə insanlar "Qarabağ" nömrə nişanlı avtomobillər və Qarabağdan gələn terrorçular haqqında pıçıldaşırdılar. 1999-cu ildə Ermənistan parlamentinin atəşə tutulması hadisəsindən hər kəs xəbərdardır. İlk baxışdan və rəsmi versiyaya görə, bunu beş "dəli" terrorçu həyata keçirib. Amma Köçəryanın bu cinayətdə iştirakına dair ciddi dəlillər var. Üstəlik, terror aktı nəticəsində onun ən təhlükəli siyasi rəqibləri - parlamentin sədri Karen Dəmirçiyan və baş nazir Vazgen Sərkisyan öldürüldü. 2008-ci ilin mart ayında İrəvanda dinc etirazçıların qırğını daha çox düşünməyə əsas verir: həmin vaxt prezident seçkilərinin saxtalaşdırılmasına etiraz edən insanlara atəş açan məhz o vaxt işğal altında olan Qarabağdan çağırılmış "xüsusi təyinatlılar" idi. Başqa epizodlar da var. Onun Xankəndidən olan emissarlarının Sumqayıt hadisələrindəki roluna dair ciddi dəlillər var", - məlumatda deyilib.

Nəşr bildirib ki, Bakıda həbsdə olan erməni müharibə cinayətkarları ifadələrində Köçəryanın Birinci Qarabağ müharibəsi zamanı ermənilərin özlərini necə satmasına dair maraqlı faktlar açıqlayıblar:

"1992-1993-cü illərdə Ağdərə-Kəlbəcər istiqamətində əməliyyatlardan birində Köçəryanla Ermənistan Müdafiə Nazirliyi arasında fikir ayrılıqları yaranıb. Daha sonra Köçəryan haqlı və əvəzolunmaz olduğunu sübut etmək üçün təxminən 100 erməni hərbçisinin Azərbaycan tərəfindən mühasirəyə alınaraq məhv edilməsinə şərait yaradıb. Üstəlik, o, öncədən bu məlumatın Azərbaycan tərəfinə "sızdırılmasını" təşkil edib. Hakimiyyəti ələ keçirmək üçün parlamentə atəş açan, onu qorumaq üçün öz xalqına qarşı mart qırğınını həyata keçirən şəxs Azərbaycana qarşı işğal müharibəsi zamanı tərəddüd etmədən özününküləri qurban verib. Hazırkı seçkiqabağı Ermənistanda Köçəryan özünü "qəhrəman" kimi təqdim etməyə çalışır. Əlbəttə ki, 2020-ci ildə, əsl müharibənin başladığı zaman bu "böyük sərkərdənin" döyüşməkdənsə qaçmağa üstünlük verdiyini unutmaqla. O, diplomatiyada da qorxaq oldu. Gəlin xatırlayaq: müharibənin ən qızğın vaxtında Köçəryan "qərar qəbul edənlərlə" danışıqlar üçün Moskvaya gedəcəyinə söz vermişdi, amma birdən koronavirus testi müsbət çıxdı. İndi isə əlləri dirsəklərinə qədər həm azərbaycanlı, həm də erməni qanı içində olan bu qorxaq, özünü sadəcə qəhrəman kimi göstərməklə qalmır. O, seçkilərdə qalib gəlməsə, Ermənistana birbaşa "inqilab" vəd edir. Sadə dillə desək, Köçəryana yenidən səs vermək qana səs vermək deməkdir. Aydındır ki, onun seçiciləri azərbaycanlılar arasında mümkün itkilərdən o qədər də narahat deyillər. Bundan əlavə, bu gün Azərbaycan ordusu təxribatlara cavab vermək, yeni ərazi ələ keçirmələrinin və xüsusən də Xocalı hadisələrinin təkrarlanmasının qarşısını almaq üçün kifayət qədər güclüdür. Xatırladaq ki, Köçəryan Xocalı soyqırımında iştirakına görə beynəlxalq axtarışdadır".

Milli.Az