Qərargah koronavirusdan ölənlərin sayını üç dəfə azaldıbmış

Rusiyada koronavirusdan ölənlərin sayı barədə Statistika Komitəsi ilə Operativ Qərargahın açıqladığı rəqəmlər arasında düz üç dəfə fərq yaranıb. Məlum olub ki, virusdan ölənlərin sayı pandemiyanın başlamasından bu yana Operativ Qərargahın açıqladığı kimi, 110 min nəfər deyil, 330 min nəfərə yaxındır.

Milli.Az virtualaz.org-a istinadən bildirir ki, Statistika Komitəsi ("Rosstat") 2020-ci ilin aprelindən 2021-ci ilin martına qədər ölkədə 249 min 702 nəfərin koronavirusun yaratdığı fəsadlar nəticəsində öldüyünü müəyyən edib. Üstəlik 166 858 halda virus ölümün əsas səbəbidir. Koronavirus aşkar edilən daha 82 min 844 pasiyent isə başqa xəstəliklərin ağırlaşması nəticəsində ölüb. Beləliklə, pandemiya nəticəsində Rusiyada ölənlərin sayı 330 mini keçir. Bu, əhali sayı nisbətində götürəndə dünya üzrə 3-cü ən yüksək ölüm göstəricisidir.

Yeni növ koronavirus infeksiyası ilə mübarizə üzrə yaradılmış federal operativ qərargah isə mayın 1-də ölkə üzrə indiyədək cəmi 110 min 520 nəfərin koronavirusdan öldüyünü bildirir. Beynəlxalq statistikada da məhz bu rəqəm əksini tapır.

Operativ qərargahla Statistika Komitəsinin rəqəmləri arasında bu cür kəskin fərqin yaranmasını müxtəlif hesablama metodikası ilə izah edirlər.  Bundan əvvəl də demoqraf-mütəxəssislər Rusiyada illik ölüm statistikasını təhlil edərək koronavirusdan ölənlərin operativ qərargah tərəfindən açıqlanan sayının reallıqlara uyğun olmadığını bildirmişdilər.

Statistika Komitəsi hesablayıb ki, 2021-ci ilin martına qədər ölənlərin sayı bir il əvvəl ölənlərin sayından 26 faiz çoxdur. Başqa sözlə, ötən illərdə qeydə alınan ölüm halları ilə pandemiya dövründə qeydə alınan ölüm halları arasında 360 min nəfər fərq yaranıb. "Reuters" isə bu rəqəmin 400 mini keçdiyini bildirir.

Rusiya hakimiyyəti ölkədə koronavirus epidemiyasının nəzarət altında olduğuna inandırır, gündəlik yoluxma halları 10 mindən yuxarı deyil, hərçənd 7 mindən aşağı da düşmür.

Aprelin sonlarında "Bloomberg" agentliyi bildirmişdi ki, Rusiyada koronavirusun üçüncü dalğası başlayıb. Çünki operativ qərargahın koronavirusla bağlı optimist dəyərləndirmələri rusiyalıların virusdan qorxmamasına və vaksin vurdurmağa həvəs göstərməməsinə gətirib çıxarıb.

Milli.Az