Dünya

Nyu-Yorkda COVID-19-un ağır formasına yoluxmuş 40 faizədək xəstə vəfat edib

22 May 2020 23:25
0 Şərh     Baxış: 1 046

"The Lancet" jurnalında dərc olunmuş tədqiqatların nəticələrinə görə, COVID-19 diaqnozu ilə xəstəxanaya yerləşdirilmiş pasiyentlərin əksəriyyətinə süni nəfəs aparatının qoşulması tələb olunur.

Milli.Az Trend-ə istinadən bildirir ki, tədqiqatlar nəticəsində, həmçinin o da məlum olub ki, yeni SARS-CoV-2 koronavirusunun törətdiyi ciddi fəsadlarla ağır formada xəstəxanalara yerləşdirilən pasiyentlərin demək olar ki, 40 faizə qədəri həyatlarını itirir.

Tədqiqatlar barədə hesabatda ABŞ-da koronavirusun yayılma mərkəzi olan Nyu-Yorkdakı 257 xəstədə virusun inkişaf prosesi təsvir edilir. "Bizim apardığımız tədqiqatlar COVID-19-un ABŞ xəstəxanalarında ağır vəziyyətdə olan xəstələrə necə təsir edə biləcəyi barədə ehtimalları əks etdirir", - deyə araşdırmanın baş müəllifi və Nyu-Yorkun Kolumbiya Universiteti yanındakı "İrvinq" Tibb Mərkəzinin pulmonoloqu doktor Maks O'Donnell bildirib.

O'Donnell və onun həmkarları öz analizlərində martın 2-dən aprelin 1-dək COVID-19 diaqnozu ilə Nyu-Yorkdakı iki xəstəxanaya müraciət etmiş 1150 nəfər yaşlı pasiyentin monitorinq nəticələrini qeyd ediblər. Tədqiqatçılar həmin xəstələr üzərində 28 gün müşahidə aparıblar. Müşahidələr zamanı xəstələrin əsasən nəfəs çatışmazlığından, qızdırmadan, öskürəkdən, əzələ ağrılarından və ishaldan şikayət etmələri məlum olub. Xəstələrin 22 faizində, yəni 1150 nəfərdən 257-nin səhhətində qəfil problemlər aşkarlanıb. Nəticədə onları intensiv terapiya şöbəsinə köçürməli olublar.

Ağır xəstələrin üçdə ikisinin kişilərdən ibarət olduğu və onların ən azı 80 faizinin bir xroniki xəstəlikdən əziyyət çəkdiyi bildirilir. Alimlər həmin xəstələrin 63 faizində yüksək təzyiq, 36 faizində isə diabet olduğunu müəyyənləşdiriblər.

Milli.Az

loading...

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.