Avtomobilinizin təkərinə plastik butulka ilişibsə əsla düşməyin

Son dövrlərdə şəhərdaxili nəqliyyatda tez-tez rast gəlinən və sürücülərin ani reflekslərini hədəf alan yeni bir oğurluq üsulu avtomobil və yol təhlükəsizliyi mütəxəssislərinin radarından yayına bilməyib. Avtomobilin qanad bölgəsinə yerləşdirilən sadə bir plastik butulka ilə qurulan bu üsul sürücülərin mexaniki nasazlıq narahatlığından istifadə edərək nəqliyyat vasitələrinin saniyələr ərzində oğurlanmasına zəmin yaradır.

Milli.Az xəbər verir ki, avtomobil mütəxəssislərinin qiymətləndirmələrinə görə oğurluq mexanizmi avtomobil dizaynındakı kor nöqtələr ilə sürücü davranışlarının birləşməsi üzərində qurulur. Cinayətkarlar butulkanı adətən avtomobilin sağ arxa təkər yuvasına, yəni sürücü avtomobilə minərkən baxış bucağından kənarda qalan nöqtəyə sıxışdırırlar.

Avtomobil hərəkətə başladıqda dönən təkər plastik elementi şassiyə doğru sıxaraq yüksək desibeldə cingiltili/çatırtılı səs çıxarır. Mütəxəssislər bu səsin salon daxilində sanki oxun (aksın) qırılması, asqı sisteminin nasazlığı və ya təkərin partlaması kimi qəbul olunduğunu vurğulayırlar. Yaranan ani təşviş havası ilə birlikdə sürücü avtomobilin mexaniki zədə aldığını düşünərək dərhal əyləcə (tormoza) basır.

Ən böyük səhv isə mühərrik işləyərkən avtomobildən düşməkdir
Avtomobil təhlükəsizliyi mütəxəssisləri tələnin əsas kritik mərhələsinin dayanma anından dərhal sonra başladığına diqqət çəkirlər. Sürücünün təşvişə düşərək mühərriki söndürmədən, qapını açıq qoyub birbaşa səsin gəldiyi sağ arxa təkərə tərəf yönəlməsi oğrular üçün ideal şərait yaradır.

Bütün diqqəti təkərə yönələn sürücünün bu ani diqqətsizliyindən faydalanan şübhəlilər açıq qapıdan avtomobilə minərək nəqliyyat vasitəsini saniyələr ərzində qaçırır və ya salon daxilindəki qiymətli əşyaları götürərək uzaqlaşırlar.

Mütəxəssislərdən təhlükəsizlik tövsiyəsi
Sözügedən oğurluq hallarına qarşı avtomobil mütəxəssisləri və sürücülük texnikası təlimçiləri aşağıdakı tədbirlərin görülməsini vacib bilirlər:

Avtomobilə minməzdən əvvəl ətrafında qısa bir vizual tur edilməli; təkər üstlərində, çamurluq daxillərində yad cisimlərin və ya ön şüşədə şübhəli kağız/vərəq və broşürlərin olub-olmadığı yoxlanılmalıdır.

Yol gedərkən gözlənilməz səs eşidildikdə təşvişə düşməmək lazımdır. Avtomobil dərhal dayandırılmamalı, qapılar içeridən kilidlənərək işıqlı, izdihamlı və ya kameraların olduğu təhlükəsiz bir nöqtəyə (yanacaqdoldurma məntəqəsi, polis məntəqəsi və s.) qədər sürməyə davam edilməlidir.

Əgər avtomobilin yoxlanılması məqsədilə dayandırılması qaçılmazdırsa, sürücülük vərdişindən asılı olmayaraq mühərrik mütləq stop edilməli, açar kontaktdan çıxarılmalı və qapılar kilidlənərək təkər bölgəsinə yaxınlaşılmalıdır.

Müəllif: Ülkər Vəliyeva (Milli.Az redaktor)