"Qaranlıq, dünyanın sonu gəlir" deyənin sonu çatdı - ARAŞDIRMA

Bu gün səhər yayılmış bəyanatda bildirilir ki, 2012-ci ildə dünyanın sonunun çatacağı və dünyaya böyük qaranlıq çökəcəyi barədə "NASA-ya xəbərdarlıq məktubu yollamış" lama ilə bağlı araşdırma aparılıb.
Lama buddizmdə kahinliyin ən üst səviyyəsidir.

Dünyanın sonunun çatacağı və Yerə böyük qaranlıq çökəcəyi ilə bağlı "məktub" İnternetdə ildırım sürətilə yayılmışdı və indi də yayılmaqdadır.
ABŞ-ın Milli Aviasiya və Kosmik Tədqiqatlar Agentliyinin (NASA) ünvanına xəbərdarlıq məktubu yollamış adamın Tibetin Kaylas şəhərinin yaxınlığındakı Qyandrek monastırının laması, "Şambala peyğəmbəri" olduğu deyilir.

Tibetin ən məşhur və nüfuzlu dini məbədlərinin yerləşdiyi Kadam, Keluq, Bon, Kaqyu, Nyinqma, Sakya, Conanq və Drukpa Kaqyu şəhərlərindəki monastırların rəhbərləri, habelə Menri, Yundruq Linq və Labraneq monastırlarının rəhbər kahinləri məktubla bağlı iddiaların yalan olduğunu bildiriblər.

Dalay Lamanın iqamətgahı sayılan Drepunq monastırının 14 kahini, Taşilunpo monastırının rəhbəri Pançen Lama, dünyaca məşhur Kumbum ibadətgahının yerləşdiyi məbədin baş kahini Pelkor Çyode və Yerpa monastırının baş kahininin imzaladığı birgə məktubda vurğulanır ki, Kaylasdakı Qyandrek monastırında "Şambala peyğəmbəri" adlı lama, yaxud da kahin olmayıb və yoxdur.

"Dünyanın sonunun çatacağı, yerə qaranlıq çökəcəyi barədə iddialar gülüncdür. Bunu yalnız Budda bilə bilər və hansısa adi insanın dünyanın sonu barədə məlumata malik olduğunu iddia etməsi yazıqlıq, əqli kasadlıq və mənhus hisslərin təzahüründən başqa heç nə deyil", - lamaların açıqlamasında bildirilir.

Onların sözlərinə görə, bu iddiaları Rusiya saytları ilə yanaşı, "Perequd" adlı sayt yerləşdirib və məhz bundan sonra xəbər internetdə ildırım sürətilə yayılmağa başlayıb.

Drepunq monastırının laması, Dalay Lamanın iqamətgahının "Müvəqqəti Xidmətçisi", dünyadakı buddistlər arasında hədsiz nüfuz və hörmət sahibi olan Lama Kirti Qompa Spituk Ramoçe isə deyib: "Dünyanın sonu barədə deyilənlər yalandır.  Bundan sonra Yerə növbə ilə Buddanın hələ 1000 inkarnasiyası gələcək. Beşinci Budda təxminən 2500 il sonra zühur edəcək. Sonra bəşəriyyət hələ 995 Buddanı gözləməlidir. O yalançı lamanın axtarılması, tapılması və yanıma gətirilməsinə göstəriş verdim.

Məlum oldu ki, xəbərin istinad edildiyi adam Qyançarekdəki qoca bağbandır. O, artıq ölüm ayağındadır. Etiraf edib ki, hansısa jurnalistlə danışanda onu ələ salmaq fikrinə düşüb və dünyanın sonu ilə bağlı yalan danışıb, Şambaladan bəhs edib. Şambalanı Buddadan savayı kimsə görməyib, onun barəsində də Dalay Lamadan savayı kimsə danışa bilməz. O qoca bağban ağlayıb, günahının bağışlanmasını istəyib. Biz onu bağışladıq. Amma Budda onu bağışlayacaqmı?!

Milli.Az