Dünya

Makronun sarayında minlərlə avroluq qarət - Oğurlayıb hərraca çıxardılar

21 Dekabr 2025 22:56

Baxış: 299

VTB-də minimal faiz dərəcəsi ilə nağd kredit 10.49%-dən

#OĞURLUQ #FRANSA

Fransa Prezidentinin rəsmi iqamətgahı olan Yelisey Sarayından ümumi dəyəri 40 min avroya yaxın olan gümüş və farfor qab-qacaq dəstləri oğurlanıb. Oğurlanan əşyaların bir qisminin Fransanın milli irsi siyahısına daxil olduğu bildirilir.

Milli.Az xəbər verir ki, hadisə ilə bağlı həyəcan təbili sarayın baş nəzarətçisi tərəfindən çalınıb. İtmiş əşyaların əksəriyyəti 1759-cu ildən bəri dövlətə məxsus olan məşhur Paris "Sevr" (Sèvres) manufakturasına aid olub.

Məsələnin maraqlı tərəfi odur ki, oğurluq faktı manufaktura nümayəndələrinin itmiş qabları "Vinted" kimi məşhur onlayn satış platformalarında tapmasından sonra üzə çıxıb. Belə ki, satışa çıxarılan külqabıların üzərindəki "Fransa Hərbi Hava Qüvvələri" və "Sevr Manufakturası" yazıları onların sərbəst satış üçün nəzərdə tutulmadığını dərhal sübut edib.

Hüquq-mühafizə orqanlarının apardığı araşdırmalar nəticəsində izin iqamətgahın daxili işçilərindən birinə - gümüş qablar üzrə sərəncamçıya aid olduğu müəyyən edilib. Araşdırma zamanı məlum olub ki, həmin şəxs onlayn qab-qacaq satışı ilə məşğul olan şirkətin meneceri ilə əlbir olub.

Şübhəli şəxsin evində, avtomobilində və iş yerindəki şkafında aparılan axtarışlar zamanı 100-ə yaxın nadir əşya aşkar edilib:

"Sevr" farforları;
Zərgər Rene Lalikin hazırladığı heykəlcik;
Məşhur "Baccarat" brendinə aid şampan qədəhləri;
Mis qazanlar.

Hazırda saray işçisi və onun iki ortağı saxlanılıb, oğurlanmış bütün əşyalar isə Yelisey Sarayına qaytarılıb. Şübhəli şəxsləri milli irsə aid əmlakı oğurlamaqda ittiham edirlər. Onları 10 ilə qədər həbs cəzası və 150 min avro məbləğində cərimə gözləyir.

Lalə Qüdrətova
Milli.Az