Kişi qıtlığı olan ölkədə qadınlar “saatlıq ər” kirayə edir

Latviyada kişi əhalisinin azalması tək yaşayan və gənc qadınlar üçün partnyor tapma problemini daha da dərinləşdirib. Əhali arasında yaranan bu gender disbalansı ölkədə yeni və diqqətçəkən bir xidmət sektorunun - "saatlıq ər" adlandırılan xidmətin ortaya çıxmasına səbəb olub. Bu xidmət qadınlara evdəki xırda təmir və məişət işləri üçün usta çağırmaq imkanı yaradır.

Milli.Az xəbər verir ki, son illərdə Latviyada kişilər arasında ölüm halları xeyli artıb. Mütəxəssislərə görə, bunun başlıca səbəbləri:

• yüksək alkoqol istifadəsi,
• iş və yol qəzaları,
• qəsd hallarının çoxluğudur.

Bu faktorlar kişilərin daha gənc yaşlarda həyatını itirməsinə gətirib çıxarır. Nəticədə qadınların sayı kişilərdən xeyli çoxdur və bu da "həyat yoldaşı və ya partnyor tapmaq" problemini ciddi şəkildə artırır.

29 yaşlı Dania festivallarda çalışdığını və iş yoldaşlarının böyük əksəriyyətinin qadın olduğunu deyir: "Problem deyil, amma mühitdə bir az da kişi olsa, daha balanslı olardı. Heç olmasa, söhbət edə və ya flört edə biləcəyimiz biri olardı."

Onun rəfiqəsi Zane isə bir çox qadının bu səbəbdən xaricdə münasibət qurduğunu bildirir: "Ətrafımdakı qadınların çoxu başqa ölkələrdə münasibətlər qurur. Burada kişi tapmaq həqiqətən çətindir."

Kişi çatışmazlığı Latviyada qeyri-adi bir sektorun formalaşmasına səbəb olub. "Bir saatlıq ər" xidməti çərçivəsində qadınlar cüzi məbləğ müqabilində evlərinə usta çağıra bilirlər. Bu ustalar:

• kran və su təchizatı nasazlıqlarını düzəldir,
• televizor montajı edir,
• mebel quraşdırır,
• elektrik işləri görür,
• ağır əşyaların daşınmasına kömək edir.

Bəzi şirkətlər həftənin bütün günləri qadınların evinə "qızıl əlli" ustalar göndərir. Digərləri isə sifariş daxil olduqdan ən gec 1 saat sonra ustanı ünvana yönləndirir.

Sosioloq Baiba Bela vəziyyəti belə izah edir: "30-40 yaş aralığında kişilərdə ölüm nisbəti qadınlara görə üç dəfə yüksəkdir. Bunun əsas səbəbi alkoqol, yol qəzaları və iş qəzələridir."

Latviyada sosial balansın pozulması nəticəsində yaranan bu yeni xidmət sektoru həm sosial problemlərin göstəricisi, həm də insanların gündəlik həyat ehtiyaclarını qarşılayan praktik bir alternativ kimi diqqət çəkir.

Lalə Qüdrətova
Milli.Az