Dünya "tikan üstündə" - Bölgədə dumanlar yüksəldi - VİDEO - FOTO

Rusiya Ukraynadakı Zaporijya Atom Elektrik Stansiyasının bir obyektini vurub, Ukrayna isə Soçidəki neft bazasına hücum edib.

Milli.Az yerli mətbuata istinadən xəbər verir ki, Rusiya Ukraynanın Zaporijya Atom Elektrik Stansiyasının dəstək obyektlərindən birini top atəşi və pilotsuz uçuş aparatları (PUA) ilə hədəfə alıb.

Hücum edilən ərazidən tüstülərin yüksəldiyi müşahidə olunub.

Beynəlxalq Atom Enerjisi Agentliyi (UAEA) hücum barədə məlumat verərək bildirib ki, stansiyanın rəhbərliyi agentliyin orada olan əməkdaşlarına obyektin səhər saat 09:00-dan etibarən hücuma məruz qaldığını bildirib. UAEA heyəti həmin vaxt ərazidə hərbi aktivliyi eşitdiyini təsdiqləyib.

Agentliyin açıqlamasına görə, zərbə endirilən obyekt atom elektrik stansiyasından təxminən 1200 metr məsafədə yerləşir və oradan tüstülərin yüksəldiyi müşahidə olunub.

UAEA-nın Baş direktoru Rafael Mariano Qrossi bildirib:

"Nüvə stansiyası yaxınlığında baş verən istənilən hücum - məqsədindən asılı olmayaraq - nüvə təhlükəsizliyi üçün potensial risk yaradır və qarşısı alınmalıdır. Bir daha çağırış edirəm: nüvə obyektləri yaxınlığında hərbi qüvvələr maksimum təmkin göstərməlidir ki, nüvə qəzası riski yaranmasın".

Qeyd olunub ki, hücum nəticəsində stansiyada hər hansı radiasiya sızması qeydə alınmayıb.

Ukraynadan cavab zərbəsi: Soçidəki neft bazası vuruldu

Zaporijyadakı obyektə hücumdan sonra Ukrayna Rusiyanın Soçi şəhərində yerləşən neft bazasına dronlarla hücum edib.

Soçi vilayətinin qubernatoru bildirib ki, yanğın Ukrayna Silahlı Qüvvələrinə məxsus dronların hücumu nəticəsində baş verib. Yanğının söndürülməsi üçün əraziyə 120 yanğınsöndürən cəlb olunub.

Rusiya Mülki Aviasiya İdarəsinin məlumatına görə, təhlükəsizlik məqsədilə Soçi hava limanında uçuşlar müvəqqəti olaraq dayandırılıb.

Kənan
Milli.Az