Özgür Özel vəzifədən uzaqlaşdırıldı, Kılıçdaroğlu qayıtdı

Türkiyənin əsas müxalifət partiyası olan Cümhuriyyət Xalq Partiyasında (CHP) böyük bir hüquqi və siyasi zəlzələ baş verib. Özgür Özəlin baş qərargah rəhbəri seçildiyi 2023-cü il tarixli qurultayın ləğvi tələbi ilə açılan davada məhkəmə "mutlak butlan" (qəti hökümsüzlük) qərarı çıxarıb. Ankara Bölgə Ədliyyə Məhkəməsi 36-cı Hüquq Dairəsi, CHP-nin 38-ci Qurultayını ləğv edərək, Kamal Kılıçdaroğlunun və köhnə rəhbərliyin vəzifələrinə qaytarılmasına qərar verib.

Milli.Az xəbər verir ki, məhkəmənin çıxardığı ehtiyat tədbiri qərarı ilə hazırkı sədr Özgür Özel və onun rəhbərliyi təcili olaraq vəzifədən uzaqlaşdırılıb. Qərara əsasən, aşağıdakı idarəetmə orqanları hüquqi qüvvəsini itirib:

Baş sədr Özgür Özel

Mərkəzi İcra Kurulu (MYK)

Partiya Məclisi (PM)

Yüksək İntizam Kurulu (YDK)

Məhkəmə qərar qətiləşənə qədər keçmiş sədr Kamal Kılıçdaroğlu və onun dövründəki idarəetmə heyətinin partiyanın rəhbərliyini yenidən təhvil almasına hökm edib. Həmçinin 2023-cü ildə keçirilən CHP İstanbul İl Konqresi və orada alınan bütün qərarlar da ləğv edilib.

Məhkəmənin ləğv qərarına əsas verən 5 mühüm səbəb
Nümayəndə (deleqat) iradəsinə müdaxilə: İstintaq sənədləri, MASAK hesabatları və şahid ifadələrinə əsasən, qurultay zamanı bəzi nümayəndələrin səsvermə seçimlərinin maddi maraqlar qarşılığında yönləndirildiyi təsbit edilib.

Vəzifə və pul vədləri: Qurultay və İstanbul konqresi zamanı bəzi nümayəndələrə pul paylandığı, bələdiyyələrdə iş yerləri, gələcək seçkilərdə namizədlik və müxtəlif siyasi vədlər verildiyi qeyd olunub.

Gizli səsvermə prinsipinin pozulması: Nümayəndələrdən səs verdikləri bülletenlərin fotoşəklini çəkərək göndərmələrinin tələb olunduğu, bununla da azad seçim iradəsinin zədələndiyi vurğulanıb.

Qanunun mütləq hökmlərinə ziddiyyət: Baş verən qanunsuzluqların sadəcə adi bir ləğv səbəbi olmadığı, ictimai asayişə və Siyasi Partiyalar Qanununun əmredici maddələrinə zidd olaraq "mütləq hökümsüzlük" (mutlak butlan) yaratdığı qəbul edilib.

Sonrakı qurultayların etibarsızlığı: 38-ci Qurultay baş verdiyi gündən etibarən hüquqi gücünü itirdiyi üçün, ondan sonra keçirilən bütün növbəti və növbədənkənar qurultaylar da avtomatik olaraq əsassız və etibarsız sayılıb.

Qərarın elan olunmasından dərhal sonra CHP-də fövqəladə vəziyyət elan edilib. Özgür Özel bütün millət vəkillərini təcili olaraq partiyanın Baş Qərargahına çağırıb. Mərkəzi İcra Kurulu (MYK) hüquqi addımları və yaranmış böhranı qiymətləndirmək üçün növbədənkənar iclasa toplanıb.

Ədliyyə Nazirliyindən verilən ilk açıqlamada isə qərarın demokratik olduğu, lakin hələ yekunlaşmadığı və apellyasiya yolunun açıq olduğu bildirilib.

Lalə Qüdrətova
Milli.Az