Dünya

Motoşlem qanununu ləğv etmək üçün mübarizə aparan vəkil dəbilqəsiz sürdüyü motosiklet qəzasında öldü

28 Oktyabr 2022 16:00

Baxış: 1 333

VTB-də minimal faiz dərəcəsi ilə nağd kredit 9.9%-dən

#HADİSƏ #ABŞ #MOTOSİKLET

On ildən artıqdır ki, motosiklet dəbilqələrinin məcburi taxılması ilə bağlı qanuna qarşı çıxan və onun ləğvinə nail olmağa kömək edən ABŞ-ın Florida ştatından olan vəkil dəbilqəsiz motosiklet sürərkən qəza nəticəsində dünyasını dəyişib.

Milli.Az bildirir ki, bu barədə "Daily Mail" məlumat yayıb.

66 yaşlı Ron Smit 62 yaşlı sevgilisi Brenda Cinan Volpe ilə başqa bir baykerin dəfn mərasiminə gedib. O, sürətini azaltmağa vaxt tapmayıb və traktora bağlanmış qoşquya çırpılıb. Kişi və sərnişini həlak olub. Yarılma nəticəsində həm kişi, həm də qadının beyin travması nəticəsində öldüyü təsdiqlənib.

"Ola bilsin ki, dəbilqə geyinsəydilər, sağ qala bilərdilər. Amma dəqiq deyə bilmərik. Təbii ki, bu, onların sağ qalma şanslarını artırardı", - motosiklet təhlükəsizliyi üzrə mütəxəssis Erik Teo bildirib.

Florida yol patrulun sözçüsü Stiv Qeskinsin sözlərinə görə, sürücünün özünün idarəetməni itirdiyi müəyyən edildiyi üçün qəza nəticəsində heç kim məsuliyyətə cəlb edilməyib.

Smit, dəbilqə tələbinin aradan qaldırılması üçün lobbiçilik edən "American Bikers for Education" təşkilatının üzvü olub. O, motosiklet təhlükəsizliyi işlərində motosikletçiləri müdafiə edən təcrübəli vəkil idi. Mütəxəssislər deyirlər ki, onun əli olduğu işlər 2000-ci ildə böyüklər arasında motosiklet sürənlər üçün məcburi dəbilqə taxmağın ləğvinə töhfə verib. Kişi qaydanı "totalitar" hesab edib və ona qarşı uğurla mübarizə aparıb. O vurğulayıb ki, dəbilqənin məcburi taxılması Dövlət Nəqliyyat Departamentinin təhlükəsizlik tələblərində göstərilməyib.

Smitin dostlarının dediyinə görə, o, insanların dəbilqəyə ehtiyacı olub-olmamasına özləri qərar vermələrini istəyib, baxmayaraq ki, onun şəxsi dəbilqələri sevməməsinin səbəbi məlum deyil.

İrfan Vəliyev
Milli.Az