“Qarabağ” - “Lex” cütü: qalibi və məğlubu nə gözləyir?

Çempionlar Liqasının birinci təsnifat mərhələsində son Azərbaycan çempionu "Qarabağ" cavab görüşünə çıxacaq.

Ağdam təmsilçisi ilk görüşdə Polşada 0:1 hesabı ilə uduzduğu "Lex"i qəbul edəcək. Oyun saat 20:00-da Tofiq Bəhramov adına Respublika stadionunda başlanacaq.

Milli.Az qol.az-a istinadən xəbər verir ki, bu cütün qalibi ÇL-də mübarizəni ikinci təsnifat mərhələsinə adlamaqla davam etdirəcək. Rəqib İsveçrə çempionu "Sürix" olacaq. İlk oyun Bakı və ya Poznanda keçiriləcək.

Cütün məğlubu isə avrokuboklarda mübarizəni başa vurmayacaq və Konfrans Liqasında yarışacaq. Burada "Qarabağ" və ya "Lex" KL-in 2-ci təsnifat mərhələsində oynayacaq. Rəqib isə Çempionlar Liqasının 1-ci təsnifat mərhələsinin "Slovan" (Slovakiya) - "Dinamo" (Batumi, Gürcüstan) cütünün məğlubu olacaq. Bu komandaların Slovakiyadakı ilk oyunu heç-heçə yekunlaşıb - 0:0.

UEFA Konfrans Liqasında 2-ci təsnifat mərhələsinin oyunları 21 - 28 iyulda olacaq.

Qeyd edək ki, ötən ildən başlayaraq avrokuboklar yeni formatda keçirilir. ÇL-in birinci təsnifat mərhələsinin məğlubu daha Avroliqaya deyil, Konfrans Liqasına düşür. Ümumiyyətə, məlum olduğu kimi, ötən ildən Avropa Liqasında ilkin, birinci və ikinci mərhələlər ləğv olunub və yarış yalnız üçüncü mərhələdən start götürür. Buraya isə UEFA-nın klub reytinqində ilk 15 yerdə olan ölkələrin komandaları buraxılır. Azərbaycan 26-cı yerdə olduğundan komandalarımız yalnız ÇL və yeni turnir olan Konfrans Liqasında yarışır.

Hələlik isə Azərbaycan çempionu, indiki halda "Qarabağ" yalnız Çempionlar Liqasında ikinci mərhələyə adlayacağı və orada uduzacağı təqdirdə Avropa Liqasının 3-cü raundunda oynaya bilər.

Lakin ümid və arzu edək ki, "Qarabağ" Çempionlar Liqasında sabah uğurlu başlanğıcın təməlini qoyacaq və mübarizəni sonadək məhz elə qitənin bu birnömrəli yarışında davam etdirəcək.

Milli.Az