Azərbaycanda mülki silahı necə əldə etmək olar?

Milli.Az-ın Day.Az saytına istinadən verdiyi məlumata görə, bunu Daxili İşlər Nazirliyindən bildiriblər.

Mülki silaha sahib olmaq istəyən vətəndaş yaşadığı ərazidəki daxili işlər orqanına və ya İctimai Təhlükəsizlik Baş İdarəsinə müraciət etməlidir. Vətəndaşın silah əldə etməsi üçün ona xüsusi icazə verilir. Bunun üçün adı çəkilən qurumlara həmin şəxsin Azərbaycan vətəndaşı olduğunu təsdiqləyən şəxsiyyət vəsiqəsinin, tibbi arayışın və 3x4 ölçülü 2 şəklin təqdim olunması vacibdir.

Vətəndaşın ictimai silah əldə etməsi üçün onun Ovcular Cəmiyyətinin üzvü olması vacib deyil. Mülki silah əldə edilməsi üçün verilən icazənin müddəti 6 aydır. Xüsusi icazədə vətəndaşın adı, soyadı, atasının adı, silahın növü, sayı, verilmə tarixi və etibarlı olduğu müddət göstərilir.

Xüsusi icazənin əks üzündə vətəndaşa satılmış silahın markası, kalibri, nömrəsi göstərilir, sənəd imzalanır və ona möhür vurulur. Odlu ov və ya idman silahı əldə etmiş şəxs onu 2 həftə ərzində qeydiyyata aldırmalıdır. Bundan sonra ona silahı gəzdirməsi və təyinatı üzrə istifadə etməsi üçün icazə verilir.

Vətəndaş ilk qeydiyyat zamanı 10 manat, təkrar qeydiyyatlar zamanı isə 5 manat dövlət rüsumu ödəməlidir. Qeydiyyatın müddəti 3 ildir.

Pnevmativ silah və aerozol qurğudan istifadə üçün xüsusi razılıq tələb olunmur. Onlar 18 yaşına çatmış vətəndaşa şəxsiyyət vəsiqəsi əsasında satılır.

Bir sıra hallarda vətəndaşa mülki silah üçün icazə verilmir. Bunlar aşağıdakılardır:

- onun 7-dən artıq ov və ya idman silahı varsa;
- müvafiq orqan tərəfindən vətəndaşın alkoqoldan, narkotik maddələrdən asılılığı, ruhi xəstəliyini və görmə qabiliyyətində qüsurun olması bildirilirsə;
- vətəndaş silahdan, döyüş sursatı və ya partlayıcıdan istifadə etməklə ağır cinayətlər törədibsə;
- vətəndaş ov və ya balıqçılıq qaydalarını, odlu silahın saxlanması və istifadəsi qaydalarını pozubsa;
- polis orqanlarında proflaktik və ya operativ qeydiyyatdadırsa;
- vətəndaş silahdan istifadə zamanı təhlükəsizlik qaydalarını bilmirsə və sair.

Milli.Az