“Yediyimiz çörək süfrəmizə natəmiz yollarla gətirilir” - Onlar cərimələnə bilər - VİDEO

Çörəyin hansı şəraitdə, harada, təmiz və yaxud natəmiz yerdə istehsal olunması insanları, alıcıları nə qədər maraqlandırırsa, onun hansı şəraitdə, hansı avtomobillərlə marketlərə daşınması bir o qədər maraqlandırır.

Milli.Az bildirir ki, ARB TV-nin "Günə Doğru" proqramında mövzu ilə bağlı maraqlı süjet hazırlanıb.

Çörək ruzi-bərəkətdir, çörəyi yerə atmaq olmaz, günahdır deyirik. Amma bərəkət deyib, yerə atmadığımız çörəyi antisanitariya şəraitində daşıyırıq. Söhbət çörəyin gigiyenik tələblərə cavab verməyən avtomobillərdə daşınmasından gedir.

İsa Əliyev - Qida mühəndisi: "Təəssüflər olsun ki, qida məhsullarında, xüsusən çörək məhsullarında və un məmulatlarında antisanitar vəziyyət həddindən artıq çoxdur. Un məmulatları, istər çörək məmulatları həm daşıyarkən, həm də satışda olarkən bir çox gigiyenik qaydalara riayət olunmalıdır".

İllərdir bu məsələ problem olsa da, həll olunmamış qalır. Xüsusən mərkəzdən uzaq məhəllədaxili marketlərə çörək gigiyenik tələblərə cavab verməyən minik avtomobillərində daşınır. Mütəxəssislər belə avtomobillərdən çörək alan market sahibinin də inzibati məsuliyyətə cəlb olunmasının vacib olduğunu deyirlər.

Eyyub Hüseynov - AİB-nin sədri: "Məşhur bir söz var, zəncirin gücü onun bir dənə həlqəsindədir. Bir həlqədə zəif oldu, artıq o zəncir yoxdur. Qida məhsulu da belədir, yəni qida zəncirində istehlakçının masasına gələnə kimi o, risk nöqtələrindən keçir. O, bir yerdə çirklənə bilər. Belə çirklənmə yerlərindən, risk nöqtələrindən biri də daşınma nöqtəsidir".

Qaydalara əsasən, çörək gigiyenik pasportu olan avtomobillərdə daşınmalıdır. Həmin pasport isə yalnız içərisində lazımi şərait yaradılmış avtomobillər üçün verilir.

Cavidan Quliyev - AQTİ-nin əməkdaşı: "Çörəkləri daşıyarkən, maşınların içində xüsusi rəflər olmalıdır. Gigiyena baxımından təmizlik mütləq şəkildə önəmlidir. Bu rəflərə çörəklər şaquli şəkildə yerləşdirilməlidir. Çörəklər daşınan maşında başqa qida məhsulunun daşınması mütləq şəkildə yolverilməz haldır. Çörəklər mağazalara daşınarkən, istər satışı həyata keçirən mütəxəssislər, istərsə də ki çörəyi daşımasını həyata keçirən ekspeditellərin fərdi mühafizə geyimlərindən istifadə etməsi önəmlidir".

Təmizliyi gözləməyib bərəkəti belə batıranlar isə günaha batmaqla yanaşı, inzibati məsuliyyət də daşıyır. Yükdaşıma qaydalarının pozulmasına görə cərimə 40, sanitar-gigiyena qaydalarını pozmağa görə 50-100 manatdır. Eyni əmələ görə, vəzifəli şəxslər 100-200, hüquqi şəxslər daha çox 200-400 manat cərimə ödəmək məcburiyyətində qala bilər.

Milli.Az