Facebook tələsi - Diqqət, sizi izləyirlər!

Facebook-u tanımayan tapılmaz. Bu gün demək olar ki, bütün vərdişlərimiz içində Facebook birinci yeri tutur. Gündəlik həyatımızda rast gəldiyimiz hər şeyi profilimizə yazırıq, bəzən qəzəbli, bəzən yumşaq, bəzən də təhqir edici şəkildə.
Təsadüfi deyil ki, Facebookdan geniş şəkildə istifadə bəzi iş yerlərində qadağalara səbəb olur. Elə düşünməyin ki, yazdığınız hər şey sadəcə Facebook-da qalır. Facebook statuslarınız həm də  gələcək iş həyatınızda və ya ictimai məşğuliyyətinizdə köməyinizə gələ bilər. Sizi  hamı izləyə bilər. Tanışlarınızdan tutmuş, məşhurlara kimi.

400 milyon insanı birləşdirən sosial şəbəkə

Facebook sosial şəbəkəsini Harvard Universitetinin tələbəsi 2004-cü ilin 4 fevralında yaratmışdır. Mark Zükerberq şəbəkədən əvvəlcə Harvard Universitetinin tələbələri ilə ünsiyyət saxlamaq üçün istifadə edir. Sonra digər universitetlər də şəbəkəyə qoşulmağa başlayırlar. Beləliklə Facebook bütün dünyanı cənginə alan məşhur sosial şəbəkəyə çevrilir. 2010-cu ilin 5 fevralına olan   statistikaya  görə, indiyədək Facebookdan  400 milyon insan qeydiyyatdan keçib.
2006-cı ildən  Facebookda qeydiyyatdan keçən azərbaycanlıların sayı artmağa başlayır. Hazırda  demək olar ki, gənclərin əksəriyyəti bu şəbəkənin üstünlüklərindən faydalanır. Əvvəllər Facebookdan sadəcə ünsiyyət vasitəsi kimi istifadə edirdilər. İndi isə Facebook həm də insanların özlərini, yaradıcılıqlarını və ictimai fəaliyyətlərini reklam edən sosil şəbəkəyə çevrilib.

Azərbaycanda Facebookdan nə üçün istifadə edirlər?

Azərbaycan gəncləri arasında apardığımız sorğunun nəticələrinə görə, gənclər Facebookdan sırf informasiya toplamaq üçün yararlanırlar. İstifadə meyarları gənclərin təhsil səviyyəsinə görə də dəyişir. Məsələn, bəziləri boş vaxtlarını keçirmək üçün, qızlarla tanışlıq,  yeni simalarla ünsiyyət saxlamaq, dostları ilə dərdləşmək, insanları bilgiləndirmək, fikir mübadiləsi aparmaq üçün Facebooka üz tutur.

Diqqətli olun, sizi müəllimləriniz izləyir

Son zamanlar xüsusilə tələbə gənclərin Facebookdan yararlanması müəllimlərin də həvəslənməsinə səbəb olub. Əksər müəllimlər tələbələrinin dəvəti ilə Facebookdan istifadə etməyə başlayıblar. Bəs ümumilikdə müəllimlər Facebookdan nə üçün istifadə edirlər?
Bakı Dövlət Universitetinin bir neçə müəllimini bu mövzuda sorğu-sual etdik.

Zahidə müəllimə Facebookda ancaq tanıdığı tələbələrlə dostluq edir. Onun dediyinə görə, Facebook tələbələrin gündəlik fəaliyyətini izləmək üçün ən yaxşı vasitədir.  "Tələbələrin bilik səviyyəsi onların profillərində əks olunur. Əsasən də sessiya qabağı dərdlərini açıq şəkildə  yazırlar. Bu mənim üçün çox maraqlıdır".
Xatirə müəlliməni Facebookda tələbələrinin sonrakı taleyi maraqlandırır. "Elə tələbələr var ki, xaricdə qalırlar, orada işləyirlər. Onların yaradıcılıqlarını başqa yolla  izləmək çətindir, asan əlaqə yaratmaq üçün Facebook əla vasitədir".
Sevinc müəllimə keçmiş tələbələrini axtarıb tapmaq üçün Facebookdan yararlanır. "Mənim üçün Facebook xüsusilə keçmiş tələbələrimlə əlaqə yaratmaq üçün ən yaxşı ünsiyyət vasitəsidir".
Lalə müəllimə Facebookdan yenilikləri öyrənmək üçün istifadə edir. "Facebook təkmilləşməyə və irəliləməyə çox yardımçı olub. Burada çox sayda ciddi və dünyaca məhşur simalarla tanış olmuşam. Bilmədiklərimi öyrənməyə, bildiklərimi öyrətməyə çalışıram".
Təranə müəllimə üçün Facebook bir icmanı xatırladır. "Mənə maraqlıdır məni kim özünə dost seçir, hansı tələbə maraqlanır. Facebookda özümə həmfikirlər tapıram, sanki insan özünü bir icmada təsəvvür edir".
Vüqar müəllim yazılarını tələbələrilə bölüşmək və onların fikrini öyrənmək üçün Facebookdan yararlanır. "Mənə tələbələrimin fikirləri çox maraqlıdır. Facebook fikir mübadiləsi üçün  çox maraqlı vasitədir".

Və sonda, unutmayın ki, heç nə ötəri deyil. Facebookda yazılanların hamısı vaxt gələr əleyhinizə istifadə edilə bilər. Ona görə də hər satatus yazanda diqqətli olun.

Vüsalə
Milli.Az