Günə enerji dolu başlayın: Uzmanlara görə səhər edilməli olan 5 hərəkət

Mütəxəssislər bildirir ki, günə hərəkətlə başlamaq həm zehni ayıqlığı artırır, həm də bədəni fiziki olaraq günə hazırlayır.

Milli.Az xəbər verir ki, fitness və sağlamlıq üzrə mütəxəssislərin tövsiyə etdiyi 5 vacib səhər hərəkəti bunlardır:

Bütün bədəni isidən hərəkətlər
Egzersizə başlamazdan əvvəl bədəni oyatmaq vacibdir. Ayaqların ön və arxa əzələlərini, kalçanı və çiyinləri yüngülcə gərin. Ürək döyüntüsünü artırmaq üçün yerində tullanma (jumping jack) və ya dizləri qaldıraraq qaçış hərəkətlərini əlavə edə bilərsiniz.

"Ağac pozası" (Balans və fokus üçün)
Bu hərəkət bədənin tarazlığını və mərkəz əzələlərini gücləndirir, eyni zamanda zehni toplamağa kömək edir.

Dik dayanın, ayaqlarınızı birləşdirin. Ağırlığı sağ ayağınıza verin, sol ayağınızı qaldırıb sağ ayağınızın daxili hissəsinə (dizdən aşağı) yerləşdirin. Tarazlığı qoruyaraq əllərinizi sinənizdə birləşdirin. 5-10 nəfəs alıb-verin və digər ayaqla təkrarlayın.

"Aşağı baxan it" (Bədəni və zehni oyatmaq üçün)
Bu hərəkət bütün bədəni uzadır və beyinə qan axınını artıraraq daha sürətli oyanmağınıza kömək edir.

Əlləriniz və dizləriniz üstündə yerə dayanın. Nəfəs verərkən kalçanızı yuxarı qaldırın və ayaqlarınızı düzləşdirin. Bədəniniz tərs "V" forması almalıdır. Çiyinlərinizi qulaqlarınızdan uzaq tutun və kürəyinizdəki gərginliyi hiss edin.

"Ölü böcək" (Mərkəz əzələləri üçün)
Qarın və bel əzələlərini gücləndirən, bel zədələnmələrinin qarşısını alan effektiv hərəkətdir.

Arxası üstə uzanın, qollarınızı yuxarı, dizlərinizi isə 90 dərəcə bucaq altında yuxarı qaldırın. Sağ qolunuzu və sol ayağınızı yavaşca yerə doğru endirin (yerə dəyməsin), sonra başlanğıc mövqeyinə qayıdın. Digər tərəflə təkrarlayın. Başlanğıc üçün 5 təkrar etmək kifayətdir.

"Squat" (Çömbəlmə) - Ümumi hərəkət qabiliyyəti üçün
Bu hərəkət bədənin bir çox əzələsini eyni anda çalışdırır, oynaqlara dəstək olur və elastikliyi artırır.

Ayaqlarınızı çiyin genişliyində açın, dik dayanın. Dizlərinizi bükərək sanki görünməz bir stula otururmuş kimi kalçanızı geriyə itələyin. Dizləriniz ayaq barmaqlarınızın ucunu keçməməlidir. Belinizi dik saxlayaraq yuxarı qalxın. Yeni başlayanlar üçün 10-15 təkrar ideal hesab olunur.

Əgər diz, bel və ya omba nahiyənizdə hər hansı bir narahatlıq varsa, bu hərəkətləri etməzdən əvvəl həkimlə məsləhətləşin və ya mütəxəssis nəzarətində edin. Unutmayın, idman bir cəza deyil, bədəninizi qeyd etməyin bir yoludur!

Müəllif: Ülkər Vəliyeva (Milli.Az redaktor)