Elçin Əfəndiyev: “Elə şair var ki, adı dillər əzbəridir, amma əsərlərini heç kim oxumur”

Baş nazirin müavini, xalq yazıçısı Elçin Əfəndiyev mədəniyyətimizə 5 ballıq şkala üzrə yaxşı qiymət verir, yəni "4". Milli.Az xəbər portalının məlumatına görə, o, ANS telekanaına müsahibəsində mədəniyyətdə olan bəzi çatışmazlıqları Azərbaycanın müstəqilliyinin hələ yeni olması ilə əlaqələndirir: "Bu gün mən desəm ki, mədəniyyətə "5" verirəm, bu o deməkdir ki, artıq tam sərhədə çatıb. Mən bu gün mədəniyyətimizə "5" vermirəm. Amma mədəniyyətə, mədəniyyətimizin bugünki inkişaf tempinə "5", mədəniyyətimizin bugünki səviyyəsinə isə "4" verirəm. Həm də yaxşı bir "4"".

Elçin Əfəndiyev Azərbaycan mədəniyyətinin müxtəlif sahələrini müqayisə etdikdə musiqi sahəsinin daha çox inkişaf etdiyini bildirir:""Azərbaycan musiqisi, əlbəttə, çox yüksək bir musiqidir. Musiqi deyəndə mən bunu hərtərfəli götürürəm. Avropa, estrada, eyni zamanda milli musiqi. Azərbaycan musiqisi hər tərəfli inkişaf etməyə başlayıb. Teatr sənəti özünün yeni mərhələsinə qədəm qoymağa başlayır. Bu gün teatr sənətində texnikanın sənətə müdaxiləsi ən çox kinoda var, amma teatra da təsir edir. Ümumilikdə musiqidə, teatrda və kinonun özündə, rəngkarlıqda, opera sahəsində və sairə irəlləyişlər göz qabağındadır".

Oxucu və tamaşaçıların, habelə dinləyicilərin bir şeyi bəyənib başqa bir şeyi nümunə gətirməsinin səbəblərinə gəlincə, Elçin Əfəndiyev insanların çox zaman özlərini olduğundan fərqli göstərməyə meyilli olduqlarını düşünür: "Bəzən həyatda belə təəssürat yaranır ki, insanlarda falşlıq var. Bu şübhəsiz var, həmişə belə olub, əlinə kitab götürməyən kitab haqqında danışıb. Elə şair var ki, hər yerdə məşhurdur, adı dillər əzbəridir, amma əsərlərini heç kim oxumur. Belə şeylər olur. Amma bu əsl tamaşaçıya, əsl oxucuya yad olan bir şeydir".

Hökumət rəsmisi bu gün Azərbaycan mədəniyyətində insanı heyrətləndirəcək nəsr əsəri, şeir, kino, teatr nümunəsinin azlığını etiraf etməklə yanaşı, bunun müvəqqəti xarakter daşıdığını deyir: "Bugünkü Azərbaycan teatr sənətinin, ədəbiyyatının inkişafı elə nümunələr verəcək ki, onlar xalq yazıçısı Elçini sidq ürəkdən və cani dildən sevindirəcək".

Milli.Az