Cəmiyyət

“Rauf Haciyev-100” musiqi festivalina start verildi - VİDEO - FOTO

4 Dekabr 2022 21:42
Baxış: 664

15 may 2022-ci il tarixində görkəmli Azərbaycan bəstəkarı, ictimai xadim, SSRİ-nin  və Azərbaycan Respublikasının Xalq artisti Rauf Hacıyevin anadan olmasının 100 illiyi tamam olur. Görkəmli bəstəkarın yubileyi ilə bağlı Azərbaycan Respublikasının Prezidenti İlham Əliyevin Sərəncamı çıxmış və buna əsasən Azərbaycan Respublikasının Mədəniyyət Nazirliyi "Rauf Hacıyev-100" Musiqi Festivalının keçirilməsini planlaşdırmışdır.

Bu gün, 3 dekabr 2022-ci il Azərbaycan Dövlət Akademik Musiqili Teatrının səhnəsində oynanılan "Qafqazlı qardaşqızı" operettası "Rauf Hacıyev-100" Musiqi Festivalının ilk tədbiri oldu.

1969-cu ildə bəstələnmiş və ilk dəfə tamaşaya qoyulmuş "Qafqazlı qardaşqızı"  sovet dönəmində ilk öncə "Təbəssümünü gizlətmə" adı altında məşhurlaşmışdı və  Rauf Hacıyevin yaradıcılığında lirik operetta xəttini davam etdirirdi. Uzun müddət sonra operetta 2015-ci ildə Respublikanın Əməkdar artisti, rejissor Əli Usubovun quruluşu əsasında tamaşaya qoyulur və o zamandan etibarən "Qafqazlı qardaşqızı" adı altında teatr repertuarına daxil olur.   

"Rauf Hacıyev-100" Musiqi Festivalını açan "Qafqazlı qardaşqızı" operettası auditoriyanın böyük  diqqəti və alqışlarını qazandı. Tamaşadan əvvəl Azərbaycan Dövlət Akademik Musiqili Teatrının direktor müavini, sənətşünaslıq üzrə fəlsəfə doktoru Vəfa Mühacirova çıxış edərək, Festivalı açıq elan etdi və "Qafqazlı qardaşqızı" operettası haqda məlumat verdi. Sonra Mədəniyyət Nazirliyinin əməkdaşı, musiqişünas Turan Məmmədəliyeva səhnəyə dəvət alıb, Musiqi Festivalı haqda və Rauf Hacıyevin yaradıcılığı haqqında qısa icmal ilə çıxış etdi.

"Qafqazlı qardaşqızı" operettası öz lirik, həyatsevər enerjisi ilə, təravətli, nəfis caz çalarlı və mahnı təbiətli simfocaz səciyyəli üslubu ilə seçilir.  Əsəri sevimli edən daha bir cəhət onun lirik təbiətli, məlahətli, sevgi və yumor dolu, yaddaqalan,  obrazlarıdır. Tamaşaya əsas milli çaları gətirən, "qafqazlı" və  "azərbaycanlı" surətini komik səpgidə təmsil edən obraz - Bəbirli və Bibixanımdır ki, daha çox milli rəqs üslublu musiqi ilə müşayiət edilir. Lirik xətlə bağlı olan cütlüklər Arif ilə Lalə, Natə van ilə Buba ən gözəl, səmimi və parlaq melodiyalarla, nəfis orkestr səslənmələri ilə öz səhnə səciyyəsini tapır.

Qeyd edək ki, sözügedən tamaşada yaradıcı heyəti rejissor Cavid İmamverdiyev, dirijor Fəxrəddin Atayev, xormeyster Vaqif Məstanov və digərləri təmsil edir, baş rollarda isə Nərgiz Kərimova (Lalə), Nicat Həbibov (Arif), Emil Heydərov (Bəbirli), Mehriban Zalıyeva (Natəvan), Rauf Babayev (Buba), Svetlana Bulax (Bibixanım), Boris Qrafkin (Rüstəmov), Əliməmməd Novruzov (Hətəmov), Firuz Məmmədov (Cavanşirov) çıxış edirdilər.

Tamaşanın sonunda səhnəyə rejissor, professor Əli Usubov, R.Hacıyevin ailə üzvləri və əsər üzərində çalışmış yaradıcı heyət dəvət edildi, kollektiv fotoşəkillər çəkdirildi.   

Milli.Az

Məqaləyə dair fotomateriallar:

5 ilədək dəyişməz 14,5%-dən zaminsiz, komissiyasız 40 000 manatadək kredit
Azernews Newspaper

XƏBƏR LENTİ

Copyright © 2023 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics