Türkiyə əleyhinə olan film Bakıda göstərilməyəcək! - Almaniya səfirliyi geri çəkildi - VİDEO - FOTO

Türkiyə əleyhinə məqamların yer aldığı "Odda-İki bacı" ("İm Feurer" və ya "Sisters apart") filminin Bakıda nümayişi baş tutmayacaq.

Almaniyanın Azərbaycandakı səfirliyi və Avropa İttifaqının nümayəndəliyinin filmin nümayişi ilə bağlı təşəbbüsü kəskin etirazla qarşılandığından geri addım atılıb.

Bununla belə, bu gün ictimaiyyət nümayəndələri filmin nümayiş etdiriləcəyi elan olunmuş "Landmark"ın qarşısına toplaşaraq, Türkiyə əleyhinə hazırlanmış filmin nümayiş etdirilməsi təşəbbüsünə kəskin etirazlarını bildiriblər.

Onlar əllərində tutduqları plakatlarla Türkiyəyə dəstək nümayiş etdirib, "Terrora son!", "Yaşasın Azərbaycan, Türkiyə!" şüarlarını səsləndiriblər.

Aksiyada ictimai asayişin və hüquq qaydasının kobud şəkildə pozulması hallarına yol verilməyib.

Aİ-nin Azərbaycandakı nümayəndəliyindən bildirilib ki, Avropa Film Festivalı çərçivəsində "Odda - İki bacı" filminin dekabrın 5-nə planlaşdırılan nümayişi ləğv edilib.

Xatırladaq ki, Bakı kinoteatrları Türkiyəyə qarşı çəkilmiş "Odda - İki bacı" ("İm Feurer" və ya "Sisters apart") filmini nümayiş etdirməkdən imtina edib.

Filmdə Almaniya bundesverinin hərbçisi olan Rojda Xani İraqda kürd hərbçilərə İŞİD-ə qarşı döyüşmək üçün təlim keçir.

Fəqət, kimsə bilmir ki, o, əslində itkin bacısı Bərivanı axtarır.

Filmdə Türkiyə hərbçiləri qəddar, qaniçən, məkrli "potensial düşmən" kimi göstərilib.

Ssenari müəlllifi və rejissoru Dafne Çarizani olan filmdə baş rollarda Almila Bagiracıq, Zübeydə Bulud və Məryəm  Bubani çəkiliblər.

Ümumiyyətlə, lent açıq-aşkar şəkildə Türkiyəyə düşmənçilik, antipatiya ruhundadır və bu hissləri təbliğ edir.

Lakin buna baxmayaraq Almaniyanın Bakıdakı səfirliyi və Aİ-nin Azərbaycandakı nümayəndəliyi filmi gələn həftə "Landmark"da nümayiş etdimək niyyətində idilər. Bununla bağlı səfirlik sosial şəbəkədə elan yayılmışdı.

Milli.Az