Siyasət

"Ermənistan İran-Avropa İttifaqı münasibətlərində unikal körpüdür" - İran parlamentinin erməni deputatı

28 İyul 2022 11:18

5 Şərh Baxış: 1 162

#IRAN #ERMƏNİSTAN

İran və Rusiya münasibətlərinin yeni səviyyəyə çıxarılmalı olduğunu deyən İran-Ermənistan parlamentlərarası dostluq qrupunun sədr müavini Ara Şverdiyan iddia edib: "İran fövqəldövlətlərlə, xüsusilə Rusiya və Çinlə birlikdə regionun ən mühüm nüfuzlu ölkəsinə çevrilə bilər ki, bu da İranın regionda mühüm təsirini gücləndirəcək".

Milli.Az İCANA-ya istinadən bildirir ki, İranın şimalında və Tehranda yaşayan erməni xristianların ölkə parlamentindəki təmsilçisi Ermənistanın "İravunk" xəbər agentliyinə müsahibəsində əlavə edib: "İran və Ermənistan arasında münasibətlər həm 44 günlük müharibədən sonra, həm də pandemiya dövründə inkişaf edib və xüsusilə ticarət mübadiləsinin həcmi əhəmiyyətli dərəcədə artaraq, təxminən 600 milyon dollara çatıb".

Daim anti-Azərbaycan mövqeyi ilə seçilən erməni deputat habelə qeyd edib: "Siyasi nöqteyi-nəzərdən də iki ölkə münasibətlərinin inkişafı istiqamətində ciddi addımlar atıb və İranın yüksək səviyyəli rəsmilərinin Ermənistana səfəri, Ermənistan parlamentinin sədrinin Tehrana gəlişi və bir çox digər ikitərəfli səfərlər bu iddianı sübut edir və İran-Ermənistan münasibətlərinin dərinləşməsi prosesinə təkan verir".

Onun sözlərinə görə, İran üçün işğalçı Ermənistan İran-Avrasiya və İran-Aİ münasibətlərində unikal körpü hesab olunur.

Rusiya və Türkiyə prezidentlərinin bu yaxınlarda Tehrana səfərinə və İranın dini rəhbərinin Ərdoğanla görüşdəki açıqlamalarına toxunan Şaverdiyan qeyd edib: "Görüşdə Əli Xameneyi vurğulayıb ki, İran-Ermənistan sərhədinin bağlanması siyasəti izlənərsə, İslam Respublikası belə bir qərara qarşı çıxacaq. Çünki bu sərhəd bir neçə min illik rabitə yoludur".

Milli.Az