Siyasət

Sarqsyanın "köpəyi" Paşinyanı öldürmək istəyir - DETALLAR

11 May 2022 15:00
0 Şərh     Baxış: 2 465

Ermənistanda general-mayor Samvel Karapetyan (Oqanovski) Xankəndidə baş verən atışma işi ilə bağlı saxlanılıb.

Atışma mayın 10-da saat 19:10 radələrində baş verib. Bir mülki şəxsin də saxlanıldığı bildirilir.

Qeyd olunur ki, faktla bağlı "silah və ya silah qismində istifadə edilən əşyalarla xuliqanlıq" və "qanunsuz olaraq silah əldə etmə, saxlama və daşıma" bəndləri ilə cinayət işi başlanıb.

İlkin araşdırma aparılır.

"Oqanovski" ləqəbi ilə tanınan general-mayor Samvel Karapetyan bir vaxtlar qarabağlı ermənilərin "müdafiə ordusu"nda "komandan müavini" olub.

Xankəndinin mərkəzində 4 gənc erməniyə məhz onun atəş açdığı iddia olunur.

Rusiya Federasiyasının sülhməramlı kontingentinin müvəqqəti yerləşdiyi ərazilərdə olan ermənilərdən Ermənistanın baş naziri Nikol Paşinyana qarşı kütləvi etiraz aksiyalarında istifadə etmək istəyirlər.

Əslində, qarabağlı ermənilərdən əsrlərdir ən müxtəlif dövlətlər, xalqlar, qövmlər və siyasi qüvvələr hər formada, ən müxtələif məqsədlərdə istifadə etdiyindən mövcud vəziyyətdə paradoksal heç nə yoxdur.

1988-ci ildə, o dönəmdəki Dağlıq Qarabağ Muxtar Vilayətində yerli ermənilər xarici ölkələrdəki erməni diasporu ilə Daşnaksutyunun əllərində alətə çevrildilər.

Məhz həmin ilin iyun ayında Xankəndində iki erməni güllələndi: "qarabağlı ermənilərin milli-azadlıq mübarizəsinə maneələr yaratdıqlarına görə".

Bir il sonra, 1989-cu ildə Xankəndində "Miasum" ("Birləşmə") hərəkatı yaradıldı. Həmin dönəmdəki Dağlıq Qarabağı Ermənistanla birləşdirməyi qarşısına məqsəd qoymuş bu qruplaşmaya Robert Köçəryan rəhbərlik edirdi.

"Miasum" özünü "yerli ermənilər ictimai-siyasi təşkilatı" kimi təqdim etsə də, özəyini və rəhbərliyini 12 nəfərlik terror dəstəsi təşkil edirdi.

Dəstədə Livan, Suriya, Fransa və ABŞ vətəndaşları olan 6 erməni vardı.

"Miasum" sonradan daha bir erməni qrupu "Krunk"la faktiki olaraq birləşdi. Daha doğrusu, Köçəryanın dəstəsi rəhbərliyi əsasən erməni ziyalılardan ibarət "Krunk"u həzm edərək əritdi.

Robert Köçəryan və onun əlaltısı Serj Sarqsyan Xankəndində hakimiyyəti ələ keçirdilər, lakin onların hədəfləri Ermənistan idi.

İrəvana "hücum" illər boyu hazırlandı və 1999-cu ildə reallaşdırıldı.

Həmin ilin oktyabrın 27-də, səhər saatlarında, parlamentin növbəti sessiyasında zala bir dəstə silahlı şəxs soxuldu. Terrorçulara daşnak Nairi Unanyan başçılıq edirdi.

Zala girənlər atəş açmağa başladılar.

Nəticədə parlamentin spikeri Karen Dəmirçyan, müdafiə naziri Vazgen Srkisyan, vitse-spikerlər Yuri Baxşyan və Ruben Miroyan, operativ məsələlər üzrə nazir Leonard Petrosyan, deputatlar Armen Armenakyan və Mikael Kotanyan həlak oldular. "Hayastan" ("Ermənistan") qəzetinin baş redaktoru, deputat Henrik Abramyan isə ürəktutmadan vəfat etdi.

Həlak olanların istisnasız olaraq hamısı prezident Robert Köçəryanın "arzuolunmaz, narahat" hesab etdiyi adamlardı.

Həmin günlər dolaşan şayiələrə görə, Nairi Unanyanın dəstəsinin hazırlanmasında Samvel Karapetyan da iştirak etmişdi.

9 il keçdi.

Ermənistandakı prezident seçkilərindəki ucdantutma və total saxtakarlıqlara etiraz edən, "seçilmiş" Serj Sarqsyanın "qələbə"sini fırıldaq hesab edən ermənilər 2008-ci ilin martın 1-də İrəvan küçələrinə çıxdılar.

Onlar seçkilərin real qalibinin sabiq prezident Levon Ter-Petrosyan olduğunu deyirdilər və Sarqsyanın "qələbə"sinin ləğvini tələb edirdilər.

Sarqsyan Prezident İqəmatgahına qapanmışdı və prezident Robert Köçəryanla vəziyyətdən çıxış yollarını axtarır, müzakirələr aparırdı.

Sonucda tapşırıq "sınanmış kadr"a - Samvel Karapetyana verildi.

S.Karapetyanın başçılıq etdiyi qrup İrəvan küçələrində etiraz aksiyası keçirənləri gülləbaran etdi.

S.Karapetyan elə o vaxtlar "Oqanovski" ləqəbi ilə tanınırdı. Onun dayıı Rudolf Oqanov Ermənistanda tanınmış "oğru" idi. S.Karapetyan da anasının soyadından faydalanaraq özünü rus general Pyotr Oqanovskiyə bənzədirdi.

Kəlbəcərdə və Horadizdəki döyüşlərdə ağır yaralanmış Samvel Karapetyan 2019-cu ilin aprel ayına qədər Xankəndindəki separatçı rejimin "müdafiə nazirinin müavini" olmuşdu.

Hazırda Ermənistandakı "Yerkrapa" Könüllülər İttifaqıının Xankəndindəki bölməsinə və separtçı rejimin "Futbol Federasiyası"na başçılıq edən Samvel Karapetyan qeyri-rəsmi milyonçu olmaqla yanaşı, Robert Köçəryanla Serj Sarqsyanın "ən sadiq kadr"larından biridir.

Ermənistanın keçmiş prezidenti Serj Sarqsyanın Xankəndindəki iki otelini və Robert Köçəryanın restoranına məhz o idarə edir.

Eyni zamanda, İrəvan ermənilərinin "Saqsyanın köpəyi" adlandırdıqları S.Karapetyan hazırda rusiyalı sülhməramlıların müvəqqəti yerləşdiyi ərazilərdəki silahlı erməni dəstələr arasında ən böyüklərindən birinin faktiki komandiridir.

Həmin dəstəni R.Köçəryan maliyyələşdirir və dəstədəki ermənilər də yalnız Köçəryanın əmrlərinə tabe olduqlarını deyirlər.

Son günlər Ermənistanda baş nazir Nikol Paşinyana qarşı keçirilən etiraz aksiyaları da 1988 və 1999-cu illərin ssenarilərinin faktiki olaraq təkrarıdır.

İrəvan küçələrindəki yürüşlərə Serj Sarqsyanın "kreatura"sı olan İşxan Saqatelyan və Robert Köçəryanın marioneti Artur Vanesyan rəhbərlik edirlər.

Onlar Xankəndində də ssenarini təkrarlamaq, separatçı rejimin indiki rəhbəri Araik Arutyunyanı kənarlaşdırıraq onun yerinə R.Köçəryanın buyruq qulu, hazırda "Təhlükəsizlik Şurasının katibi" olan Vitali Balasanyanı gətirməyə çalışırlar.

Təbii ki, bəhs olunan ssenarilər Nikol Paşiyana qarşı sui-qəsdi və Xankəndində atışmaları istisna etmir.

Amma Köçəryan-Sarqyan dueti və Paşinyanın "Qərbmeylli" kursundan narazı qalaraq Ermənistandakı etiraz aksiyalarına maliyyə-texniki dəstəyi verən "Şimaldakı hami" bir məqamı unudurlar: nə indi 1988 və ya 1999-cu ildir, nə də ölkəminz həmin illərin Azərbaycanı.

Qarabağda müvəqqəti yerləşmiş rusiyalı hərbçilərə güvənənlər yanılırlar: Azərbaycan Ordusu mikroskopik həddə olsa belə, situasiyanın təhlükəli məcraya yönəldiyini hiss edən vəziyyətə kəskin müdaxilə edcək.

Bu isə antiterror əməliyyatını istisna etmir.

Özü də əsla...

Elçin Alıoğlu
Milli.Az

 

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.

Global site tag (gtag.js) - Google Analytics