Alüminium folqanın yararlılıq müddəti varmı?

Mətbəxin ən praktik köməkçilərindən biri olan alüminium folqanın qidalar kimi konkret bir son istifadə tarixinin olub-olmaması hər zaman maraq doğurur. Şkaflarda aylarla, hətta illərlə qalan bu rulonların keyfiyyətini qorumaq əslində düşündüyünüzdən daha çox diqqət tələb edir. Düzgün şəraitdə saxlanılmayan folqalar zamanla struktur dəyişikliyinə uğrayaraq funksionallığını itirə bilər.

Milli.Az alüminium folqanın ömrünü müəyyən edən amillər və diqqət yetirilməli məqamları təqdim edir:

Alüminium folqanın keyfiyyətini qoruyan ən mühüm amil onu rütubətdən uzaq tutmaqdır. Nəmli mühitdə qalan folqanın səthində su ilə təmas nəticəsində sürətli korroziya baş verir ki, bu da materialın strukturunu tamamilə pozur.

Folqanı yuyucu çanağın (moykanın) altındakı dolablar kimi su sızması riski olan yerlərdə saxlamayın. Onu öz orijinal karton qutusunda, quru və nemsiz siyirtmələrdə saxlamaq ən effektiv üsuldur.

Yüksək temperatur metalın səthində oksigenlə reaksiyanı sürətləndirərək materialın keyfiyyətini aşağı salır.

Sobanın yanı və ya ocağın arxası kimi birbaşa istilik alan yerlər əvəzinə sərin, qaranlıq dolab içlərinə üstünlük verilməlidir. İstilik artımından qorunan folqa daha uzun müddət öz işləkliyini saxlayır.

Xarab olma əlamətləri: Rəng dəyişməsinə diqqət
Folqanın hələ də istifadəyə yararlı olub-olmadığını anlamaq üçün onun səthinə baxmaq kifayətdir:

Səthdə yaranan tünd ləkələr və ya ağ tozvari təbəqə korroziyanın göstəricisidir.

Rulonu açarkən folqanın tez cırılması, üzərində kiçik deşiklərin yaranması və ya materialın həddindən artıq kövrək olması onun yararlılıq müddətinin bitdiyini sübut edir. Bu halda yeni rulondan istifadə etmək daha təhlükəsizdir.

Kimyəvi aşınmalar: Hansı qidalarla olmaz?
Alüminium folqa davamlı görünsə də, bəzi maddələrlə reaksiya nəticəsində deşilməyə meyillidir:

Turşulu qidalar: Pomidor, sitrus meyvələri (limon, portağal) və ya sirkəli qidalar kimi yüksək asidli məhsulları folqaya birbaşa bükmək kimyəvi aşınmanı tətikləyir. Bu cür qidalarla təmasda olan folqa qısa müddətdə əriyə və ya koroziyaya uğraya bilər. Bu tip qidaların saxlanması üçün digər alternativlərə (məsələn, şüşə qablar) üstünlük vermək daha doğrudur.

Alüminium folqanın qutusu üzərində son istifadə tarixi yazılmasa da, onun "ömrü" sizin saxlama şəraitinizdən asılıdır. Quru, sərin və qaranlıq mühitdə o, illərlə keyfiyyətini itirmədən qala bilər.

Lalə Qüdrətova
Milli.Az