Maraqlı

Səudiyyə Ərəbistanında futuristik şəhər layihəsinin təqdimatı olub

11 Yanvar 2021 21:20
Baxış: 866
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Səudiyyə Ərəbistanının vəliəhd şahzadəsi Məhəmməd bin Salmanın rəhbərlik etdiyi NEOM şirkəti təbiətlə insanların harmoniya şəraitində yaşayacağı futuristik şəhərin salınması üzrə yeni "The Line" layihəsinin təqdimatını edib.

Milli.Az AZƏRTAC-a istinadən bildirir ki, bu layihə urbanizasiya tarixində inqilab kimi qiymətləndirilib.

Təxminən 170 kilometrlik ərazini əhatə edəcək yeni şəhərdə insanlar avtomobillər olmadan, təmiz ekoloji şəraitdə və fərqli infrastrukturdan istifadə etməklə yaşayacaq. Onun salınması üçün Səudiyyə Ərəbistanı hökuməti 48 milyard dollar vəsait ayıracaq və 380 min iş yeri açılacaq.

Vəliəhd şahzadə Məhəmməd bin Salman layihənin təqdimat mərasimində bildirib: "Tarix boyu şəhərlər öz vətəndaşlarını qorumaq üçün salınıb. Sənayeləşmə inqilabından sonra maşınlar, fabriklər onları yaşanılmaz hala gətirib. Proqnozlar göstərir ki, 2050-ci ildə 1 milyarddan çox insan karbon qazı emissiyası və dəniz səviyyəsinin qalxması səbəbindən şəhərləri tərk edəcək. Biz təbiəti inkişaf naminə qurban verməməliyik. Təkcə çirklənmə səbəbindən hər il 7 milyon insan həyatını itirir, 1 milyon nəfər isə avtomobil qəzalarında həlak olur. Bu səbəblərdən bizim yeni layihədə 1 milyon şəhər sakini avtomobilsiz, küçələrsiz və sıfır karbon qazı emissiyası olacağı futuristik şəhərdə yaşayacaq".

Uzun kəmər formasında inşa ediləcək futuristik şəhərdə bütün zəruri xidmət sahələri, habelə məktəblər, xəstəxanalar, istirahət məkanları elə yaxın dizayn ediləcək ki, insanlar müasir nəqliyyat vasitələrindən istifadə etməsinlər. Bundan başqa, texnologiyanın ən son nailiyyətləri tətbiq edilməklə, şəhər sakinlərinin digər məntəqələrə səyahəti üçün elektromobillərdən istifadə olunacaq. "Ağıllı şəhər"də süni intellektin də geniş tətbiqi nəzərdə tutulur.

Futuristik şəhərin inşasına yaxın aylarda başlanacaq. Əsas sponsor qismində Səudiyyə Ərəbistanının İctimai İnvestisiya Fondu çıxış edəcək.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.