Güclü və parlaq saçların sirri: İtalyan üsulu saç yuma

Saçlarınızı yuduqdan qısa müddət sonra sönürsə, ucları quruyursa və ya parlaqlığını itirirsə, səbəb istifadə etdiyiniz şampun deyil, yuma qaydanız ola bilər. Son dövrdə populyarlaşan İtalyan üsulu saç yuma rutini, saç dərisini yormadan daha nazik və yumşaq bir qulluq anlayışına əsaslanır.

Milli.Az italyan üsulu saç yuma rutinində diqqət yetirilməli olan məqamları təqdim edir:
Saçı hər gün yumayın: Saçı çox tez-tez şampunlamaq saç dərisinin təbii yağ balansını poza bilər, bu da saç uclarının daha quru və cansız görünməsinə səbəb olar. Saç tipinizə görə yuma tezliyini azaltmaq, saçın öz təbii yağ tarazlığını qorumasına kömək edir.

Şampunu düzgün tətbiq edin: İtalyan üsulunda şampun əsasən saç dərisinə tətbiq olunmalıdır. Barmaq ucları ilə saç diblərinə nazikcə masaj etmək həm təmizlik hissini artırır, həm də dərini rahatladır. Şampunu saç uclarına xüsusi sürtməyə ehtiyac yoxdur, çünki durulama zamanı su ilə birlikdə saç boylarına da təmas edir.

Saç kremini diblərə vurmayın: Saç kremini diblərə tətbiq etmək saçların daha tez yağlanmasına və sönük görünməsinə yol aça bilər. Kremi saçın orta hissələrindən uclarına doğru tətbiq etmək daha doğrudur; bu, xüsusilə nazik telli saçların həcmini qoruması üçün vacibdir.

Çox isti sudan qaçın: Saçları çox isti su ilə yumaq saç dərisini quruda və tellərin mat görünməsinə səbəb ola bilər. İtalyan üsulunda saçları ilıq su ilə yumaq, son durulamada isə daha soyuq su istifadə etmək tövsiyə olunur. Bu, saç tellərinin daha hamar və parlaq görünməsinə kömək edir.

İstilikdən istifadəni azaldın: Fen, düzləşdirici kimi yüksək istilik verən cihazlar saç tellərini zədələyə bilər. İtalyan üsulunda saçları mümkün qədər təbii şəkildə qurumağa buraxmaq tövsiyə edilir. İstilikdən az istifadə etmək saçların zamanla daha canlı görünməsinə töhfə verir.

Bu üsul sadə və effektiv olsa da, hər kəsin saç quruluşu fərqlidir. Yağlı saç dərisi, kəpək, ekzema, həssaslıq və ya tökülmə kimi problemləriniz varsa, qulluq rutininizi öz ehtiyaclarınıza uyğun şəkildə müəyyən etməlisiniz.

Müəllif: Ülkər Vəliyeva (Milli.Az redaktor)