“Azeri Light” 118 dollara düşdü

Azərbaycanın "Azeri Light" markalı neftinin qiyməti İtaliyanın Augusta limanında CIF bazasında əvvəlki göstəricidən 4,27 ABŞ dolları və ya 3,49% ucuzlaşaraq 118,22 ABŞ dollarına enib.

Bu barədə Milli.Az-a neft bazarındakı mənbə məlumat verib.

Bildirilib ki, Türkiyənin Ceyhan limanında FOB bazasında "Azeri Light" markalı neftin bir barelinin qiyməti 4,23 dollar və ya 3,66% ucuzlaşaraq 111,45 ABŞ dolları təşkil edib.

"URALS" markalı xam neftin qiyməti əvvəlki göstərici ilə müqayisədə 4,65 dollar və ya 5,44% azalaraq 80,89 dollar/barelə bərabər olub.

Şimal dənizində hasil edilən "Dated Brent" markalı neftin bir barelinin qiyməti əvvəlki göstərici ilə müqayisədə 4,93 dollar və ya 3,97% artaraq 119,09 dollar/barel təşkil edib.

Azərbaycanın 2026-cı il üçün dövlət büdcəsində neftin orta qiyməti 65 ABŞ dolları/barel olaraq hesablanıb.

"Trading Economics"in məlumatına görə, xam neftin qiyməti çərşənbə günü bir əvvəlki sessiyada kəskin ucuzlaşdıqdan sonra barel üçün 90 dollardan aşağı səviyyədə qalıb.

"Yaxın Şərqdən enerji axınlarının yaxşılaşması və ABŞ-də strateji neft ehtiyatlarının növbəti böyük həcmdə bazara çıxarılması tədarük narahatlıqlarını azaldıb.

Analitiklərin bildirdiyinə görə, Yaxın Şərqdən xam neft ixracının 10 günlük orta göstəricisi sutkada 17,5 milyon barelə çatıb ki, bu da müharibədən əvvəlki səviyyənin 98 faizinə bərabərdir.

Bu, Səudiyyə Ərəbistanının "Şərq-Qərb" neft kəməri vasitəsilə xam neft ixracını gücünün təxminən yarısı həcmində bərpa etməsi fonunda baş verib. Bununla yanaşı, Hörmüz boğazından gizli daşınma kanalları vasitəsilə neft axını davam edir.

ABŞ-da isə hökumət ölkədə yanacaq qiymətlərinin kəskin artması fonunda Strateji Neft Ehtiyatından (SPR) 40 milyon barelə qədər neftin bazara çıxarılmasını planlaşdırır.

Sənaye məlumatları da ötən həftə ABŞ-də xam neft ehtiyatlarının 1 milyon barel artdığını göstərib.

Bununla belə, ABŞ-nin əsas neft göstəricisi ABŞ-İran münaqişəsinin uzanması və genişmiqyaslı tədarük pozuntuları səbəbindən ardıcıl üçüncü ayı da artımla başa vurmağa hazırlaşır", - məlumatda qeyd edilib.

Müəllif: Malik Məlikov (Milli.Az redaktor)