Adi çay zənn etdi, 22 yaşlı gənc içdikdən sonra iki dəfə ürəyi dayandı

Cənub-Şərqi Asiya mənşəli çay içən sağlam gəncin iki dəfə ürəyi dayanıb. Ürək döyüntüləri dəqiqədə 25-30-a qədər enən 22 yaşlı xəstəyə ürək stimulyatoru (peysmeyker) taxılıb, həkimlər isə hadisənin səbəbinin mitraginin zəhərlənməsi ola biləcəyini müəyyən ediblər.

Milli.Az xəbər verir ki, sağlam 22 yaşlı gənc getdikcə populyarlaşan kratom çayını içdikdən sonra 2 dəfə ürək dayanması yaşayıb. Yenidən həyata qaytarılan gəncin ürək döyüntü sürəti daha sonra ciddi şəkildə yavaşlayaraq dəqiqədə yalnız 25-30 vuruşa düşüb. Buna görə də ona ürək stimulyatorunun taxılması zərurəti yaranıb. Gənc həmçinin müvəqqəti və yüngül nevroloji problemlər yaşayıb. 2 həftə davam edən xəstəxana müalicəsindən sonra heç bir qalıcı sağlamlıq problemi olmadan evə buraxılıb.

Cənub-Şərqi Asiyaya xas bir bitki olan kratomun yarpaqları əsasən toz və ya çay şəklində istehlak edilir. İnternetdə və bəzi xüsusi mağazalarda kratom ağrı, narahatlıq və müxtəlif digər şikayətlərə kömək edə biləcək təbii məhsul kimi bazara çıxarılır.

Lakin bitkinin təhlükəsizliyi ilə bağlı ciddi sual işarələri mövcuddur. Almaniya Federal Dərman və Tibbi Cihazlar İnstitutu (BfArM) ötən il etdiyi xəbərdarlıqda kratomun təhlükəsizliyi və effektivliyinin hələ kifayət qədər araşdırılmadığına diqqət çəkib. Alman istehlakçı təşkilatı "Verbraucherzentrale" də kratom istifadəsinin asılılıq və ciddi əks-təsir riski daşıya biləcəyi barədə xəbərdarlıq edir. İnsbrukdakı həkimlər isə ABŞ-də bildirilən kratom zəhərlənməsi hallarının son illərdə əhəmiyyətli dərəcədə artdığına diqqət çəkirlər. ABŞ Milli Zəhər Məlumat Sisteminə görə, kratomla əlaqədar qeydə alınan halların sayı 2015-ci ildən 2025-ci ilə qədər illik 3434 hala yüksəlib.

Həkimlər qeyd edirlər ki, kratomun aktiv komponentlərindən biri olan mitragininin standart toksikologiya testlərində rutin olaraq yoxlanılmaması səbəbindən ciddi reaksiyaların əsl sayı qeydə alınan hallardan daha çox ola bilər. Həkimlərin qiymətləndirməsinə əsasən, hər hansı məlum sağlamlıq problemi olmayan bu gəncdə baş verən ürək dayanmasının ən ehtimal olunan səbəbi mitraginin zəhərlənməsi olub.

Müəllif: Ülkər Vəliyeva (Milli.Az redaktor)