Mədəniyyət

Arif Ələsgərovun 70 illik yubileyinə həsr olunmuş fərdi yaradıcılıq sərgisi keçiriləcək

10 Oktyabr 2014 20:27

0 Şərh Baxış: 1 317

#AZERBAİJAN #MƏDƏNİYYƏT

17-21 oktyabr 2014-cü il tarixlərində AzərbaycanMədəniyyət və Turizm Nazirliyinin təşkilatçılığı ilə Azərbaycan Milli İncəsənət Muzeyində əməkdar rəssam Arif Ələsgərovun 70 illik yubileyinə həsr olunmuş fərdi yaradıcılıq sərgisi keçiriləcək.

Nazirlikdən Trend-ə verilən məlumata görə, sərginin açılışı 2014-cü il 17 oktyabr, saat 18:00-da Azərbaycan Milli İncəsənət Muzeyində olacaq.

A.Ələsgərov 1944-cü ildə Bakıda anadan olub. 1964-72-ci illərdə Sankt-Peterburq V.İ.Muxina (B.Ştiqlits) adına Rəssamlıq Akademiyasını bitirib. 1975-ci ildə SSRİ Rəssamlar İttifaqının üzvlüyünə qəbul olunub. 1977-2001-ci illərdə Azərbaycan Dövlət Mədəniyyət və İncəsənət Universitetində müəllim, baş müəllim, dosent kimi çalışıb. 2001-2008-ci illərdə Azərbaycan Dövlət Rəssamlıq Akademiyasında kafedra müdiri vəzifəsində çalışıb və professor elmi adını alıb.

A.Ələsgərov Azərbaycan təsviri sənətinin inkişafına və təbliğinə böyük töfhələr verib, qrafika və rəngkarlıq sahəsində özünəməxsus dəsti-xətti ilə tanınıb. Xüsusilə, qrafika sənətinin ənənələrinin yaradıcı surətdə davam və inkişaf etdirilməsi, milli dəyərlərin, ədəbi irsin və qədim ənənələrin təbliği onun yaradıcılığının əsas xüsusiyyətidir.

Uzunmüddətli bədii fəaliyyəti dövründə təkrarsız üsluba malik rəssam çoxsaylı əsərlər yaradıb, 1972-ci ildən etibarən respublika, ümumittifaq və beynəlxalq sərgilərdə mütəmadi olaraq iştirak edərək bir çox mükafatlara layiq görülüb. O, həm də 2001-2003-cü illərdə nəşr olunmuş "Estampın tarixi və Ofort" və "Dizaynda kompozisiya" adlı dərsliklərin müəllifidir.

2008-ci ildən Türkiyənin Karadeniz Texnik Universitetində Rəssamlıq fakültəsinin professoru və kafedra müdiridir. 1992-ci ildə "Əməkdar rəssam" fəxri adına layiq görülüb. Hazırda Türkiyədə yaşayır.

Milli.Az