“Muzeydə kino” layihəsi çərçivəsində Tahir Salahovun həyat və yaradıcılığına həsr olunmuş sənədli film nümayiş etdirilib - (Foto)

24-25 oktyabr tarixlərində Azərbaycan Milli İncəsənət Muzeyində "Muzeydə kino" layihəsi çərçivəsində görkəmli rəssam, Xalq rəssamı Tahir Salahovun həyat və yaradıcılığına həsr olunmuş sənədli film nümayiş etdirilib.

Film nümayişi iştirakçılara Azərbaycan təsviri sənətinin inkişafında mühüm rol oynamış sənətkarın həyat yolu, yaradıcılıq xüsusiyyətləri və milli rəngkarlığa verdiyi töhfələr haqqında daha ətraflı məlumat əldə etmək imkanı yaradıb.

Nümayişdən sonra iştirakçılar muzeyin "1920-1980-ci illər Azərbaycan rəngkarlığı və qrafikası" adlı daimi ekspozisiyası ilə tanış olublar. Ekskursiya zamanı Azərbaycan rəngkarlığının müxtəlif inkişaf mərhələlərini əks etdirən əsərlər, dövrün bədii xüsusiyyətləri və rəssamların yaradıcılıq axtarışları haqqında məlumat verilib. İştirakçılar Tahir Salahovun sənət dünyası ilə daha yaxından tanış olmaq, onun yaradıcılıq üslubunu və əsərlərinin təsir gücünü muzey mühitində müşahidə etmək imkanı əldə ediblər.

Ekskursiyanın davamı olaraq Tahir Salahovun yaradıcılığına həsr olunmuş interaktiv proqram təşkil edilib. Proqram çərçivəsində muzeyin Mədəniyyət və Təhsil şöbəsinin təhsil proqramları üzrə mütəxəssisi, rəssam Murad Qurbanovun müəllifi olduğu, sənətkarın məşhur "Təmirçilər" əsəri əsasında hazırlanmış pazl təqdim olunub.
Proqramın əsas hissəsini təşkil edən "Gör və tap" oyunu iştirakçıların əsərə diqqətlə baxmasını, təsvirin ayrı-ayrı elementlərini araşdırmasını və müşahidələrini bölüşməsini nəzərdə tutub. İştirakçılar rəsm əsərindəki personajların xüsusiyyətlərini, geyim detallarını, rəng çalarlarını və kompozisiyanın ayrı-ayrı elementlərini müəyyənləşdirərək əsərin bədii quruluşunu daha dərindən öyrəniblər. Daha sonra pazlın hissələrini birləşdirərək "Təmirçilər" əsərinin təsvirini yenidən qurublar.

Bu fəaliyyət vasitəsilə iştirakçılar rəsm əsərinə yalnız bütöv bir təsvir kimi deyil, ayrı-ayrı detalların qarşılıqlı əlaqəsindən yaranan bədii kompozisiya kimi yanaşmaq imkanı əldə ediblər. Oyunun gedişində diqqət, məntiqi düşünmə, vizual qavrayış və komanda şəklində işləmək bacarıqları da təşviq olunub.

"Muzeydə kino" layihəsi çərçivəsində təşkil edilən film nümayişi, ekskursiya və interaktiv fəaliyyətlər incəsənətin müxtəlif üsullarla öyrənilməsinə şərait yaradıb. Proqram iştirakçıların Tahir Salahovun yaradıcılığına marağını artırmaqla yanaşı, muzeydə öyrənmə prosesini daha canlı, interaktiv və yaddaqalan edib.

İnformasiya dəstəyi - Trend.Az, Day.Az, Milli.Az