Bakıda “Avropanın İrsi” mövzusunda iki günlük yaradıcı vorkşop başa çatdı - FOTO

Bakıda "Avropanın İrsi" mövzusunda iki günlük yaradıcı vorkşop başa çatdı. Tədbir Avropa İttifaqı və Arts Council Azerbaijan QHT tərəfindən təşkil olunub.

Vorkşop ticarət mərkəzlərində keçirilib və rəssamları, eləcə də geniş ictimaiyyəti Avropa mədəni irsi mövzusu ətrafında bir araya gətirib. Məhz bu məkanların seçilməsi təsadüfi olmayıb. Təşkilatçılar incəsənəti ictimai məkana çıxararaq onu daha geniş auditoriya üçün əlçatan etməyi hədəfləyiblər. Ticarət mərkəzində keçirilən format təsadüfi ziyarətçiləri, ailələri və gəncləri prosesə cəlb edərək yaradıcı mühiti cəmiyyətlə canlı dialoqa çevirib.

İlk gün proqram "Detache-Sabah" skripka ansamblının çıxışı ilə müşayiət olunub və bu, tədbirə xüsusi ab-hava qataraq bədii atmosferi daha da gücləndirib. İki gün ərzində ziyarətçilər əsərlərin real vaxt rejimində necə yaradıldığını izləmək imkanı əldə ediblər.

Vorkşopda rəssamlar Nigar Müslimova, Ləman Hacıyeva, Sevinc Əhmədova, Raul Sadıqov, Oksana Kazımova, Leylifar Museyibova, Ülviyyə Xeyrullazadə, Təranə Əliyeva, Eldar Babazadə, Sevinc Gəncəliyeva, Banu Əhmədzadə, Turanə Hüseynova, Nailə Məhərrəmova, Asmar Azadi, sevda Rüstəmova, Röya Həsən, Leyla Orucova, Samir Qafarov və Günay İbişova iştirak ediblər.

Rəssamlar Avropa irsini rəngkarlıq vasitəsilə öz baxış prizmasından təqdim edərək memarlıq abidələrini, mədəni simvolları, tarixi obrazları və müasir Avropa dəyərlərini interpretasiya ediblər. Tamaşaçılar kompozisiyaların formalaşmasını, rəng palitrasının seçilməsini və hər bir əsərin bədii konsepsiyasının yaranmasını maraqla izləyiblər.

FantazEU 2026 festivalının təşkilatçıları bu mühüm mədəni hadisənin uğurla həyata keçirilməsinə verdikləri töhfəyə görə bütün iştirakçılara təşəkkürlərini bildiriblər.

Festivalın missiyası mədəni üfüqlərin genişləndirilməsi və Avropa ilə Azərbaycan arasında əlaqələrin möhkəmləndirilməsidir.

İnformasiya dəstəyi -  Trend.Az, Day.Az, Milli.Az, Azernews.Az