Mədəniyyət

Bazar günləri ilham dərsləri Ramil Qasımovla – gənc istedadlar necə formalaşır – VİDEO

12 Fevral 2026 21:24

Baxış: 1 908

VTB-də minimal faiz dərəcəsi ilə nağd kredit 9.9%-dən

#MƏDƏNİYYƏT

Azərbaycan Respublikasının Əməkdar artisti Ramil Qasımov tərəfindən təsis olunmuş Bülbül adına Vokal Məktəbində hər bazar günü uşaqlar üçün ödənişsiz vokal dərsləri keçirilir. Bu təşəbbüs təkcə maarifləndirici layihə deyil, həm də gənc istedadların öz bacarıqlarını üzə çıxara bildiyi, peşəkar sənət aləminə ilk addımlarını atdığı yaradıcı məkana çevrilib, Trend Life xəbər verir.

Dərslər isti və ruhlandırıcı mühitdə təşkil olunur. Burada uşaqlar düzgün nəfəs texnikasını, səs üzərində işləməyi, səhnə mədəniyyətini öyrənir, klassik və müasir repertuarla tanış olurlar. Ən başlıcası isə musiqini duymağı, hisslərini mahnı vasitəsilə ifadə etməyi və öz güclərinə inanmağı mənimsəyirlər. Bir çoxları üçün bu bazar görüşləri həftənin ən səbirsizliklə gözlənilən anına çevrilib.

Bu gün sizlərlə dərslərdən kiçik, lakin olduqca səmimi və duyğulu məqamları - musiqi, sevinc və yaradıcı enerji ilə zəngin canlı kadrları bölüşürük.

Bülbül adına Vokal Məktəbi 2023-cü ildə yaradılıb. Tədris prosesi böyük Ustadın miras qoyduğu milli vokal məktəbi ənənələrinə əsaslanır və istedadlı gənclər nəslinin yetişdirilməsinə yönəlib. Təhsil ödənişsizdir. Bu müddət ərzində məktəbin yetirmələri müxtəlif konsert proqramlarında və festivallarda iştirak edib, onlardan bəziləri ali məktəblərə qəbul olunub. 2025-ci ildə məktəbin ilk məzun buraxılışı baş tutub.