“Baku Open Dance Championship 2024” müsabiqəsinin qeydiyyatı açıq elan olunur! - FOTO

"Azərbaycan Gənclər İttifaqı" və "Azərbaycan Rəqs Assosasiyası"nın birgə təşkilatçılığı ilə növbəti bir layihəyə start verilir. "Baku Open Dance Championship 2024" adlanan beynəlxalq rəqs müsabiqəsi 10.03.2024 tarixində Rəşid Behbudov adına Dövlət Mahnı Teatrında keçiriləcək.

Müsabiqəyə təkcə Bakı şəhərindən, Azərbaycanın digər bölgələrindən deyil, həm də müxtəlif ölkələrdən müraciət edən iştirakçılar var. Belarusiyadan isə artıq 100-dən çox iştirakçı qeydiyyatdan keçib.

Layihənin rəhbəri "Azərbaycan Rəqs Asossasiyası"nın prezidenti Əziz Əzizov bildirib: "Artıq 11 ildir uğurla həyata keçirilən bu müsabiqəmizin əhəmiyyəti rəqs incəsənətinin inkişafı ilə yanaşı gənclərimizin asudə vaxtlarını səmərəli keçirmələri və öz istedadlarını ortaya çıxara bilmələridir. Düşünürük ki, dəstəyimiz gənclərimizin özlərini inkişaf etdirmələrinə, sağlam rəqabət və özünəinam hisslərinin formalaşmasına, sosiallaşmalarına öz töhfəsini verəcək. Onu da əlavə etmək lazımdır ki, iştirakçılarımıza və qonaqlarımıza Azərbaycanın milli rəqsləri üzrə ustad dərsləri keçiləcək. Burada əsas məqsədimiz xalq rəqslərinin təbliği və milli xüsusiyyətlərin aşılanmasıdır".

"Azərbaycan Gənclər İttifaqı"nın sədri Zakir Əliyev qeyd edir "Rəqs özündə zəngin tarixilik daşıyan bir incəsənət növüdür. Onu qorumaq, yaşatmaq, inkişaf etdirmək çox vacibdir. Bu səbəbdən biz də öz layihələrimizdə ona xüsusi yer ayırırıq. Müsabiqənin bütün iştirakçılarına isə uğurlar arzu edirik".

Müsabiqədə iştirakçılar müvafiq yaş qruplarına əsasən bölünəcəklər:

• Körpələr (3-6 yaş)
• Uşaqlar (7-10 yaş)
• Yeniyetmələr (11-15 yaş)
• Böyüklər (16-25 yaş)
• Profi (25+ yaş)

Folklor Etnik, Folklor Stilizasiya, Folklor Show, Dünya Xalqları Rəqsi, Hip-hop Show, Akrobatik rəqs, Showdance, Bollywood, Belly dance, Klassik Hind rəqsi, Cheer Dance, Klassik rəqs növləri üzrə solo, duet, kiçik və böyük qruplar, ansambl və böyük ansambl formasında çıxış edəcəklər.

Sonda isə əsasnamədəki qiymətləndirmə meyarlarına müvafiq olaraq qaliblər bəlli olacaq. Münsiflər heyəti ölkəmizin dəyərli, əməkdar incəsənət xadimləri və xalq artistlərindən ibarətdir.

Müsabiqəyə qeydiyyat 6 mart saat 17:00 tarixinədək davam edəcək. Əgər siz də müsabiqəmizin qalibi olmaq istəyirsinizsə, qeydiyyatdan keçməyə tələsin! 

Qeyd: Müsabiqənin əsasnaməsini, ərizə formasını əldə etək, əlavə məlumat və yarana biləcək bütün suallar üçün 050-250-22-93 mobil nömrəsi ilə əlaqə yarada bilərsiniz.

İnformasiya dəstəyi -  Trend.Az, Day.Az, Milli.Az, Azernews.Az