Mədəniyyət

Opera və Balet Teatrında Tofiq Bakıxanovun 90 illik yubileyi qeyd olunub - FOTO

6 Dekabr 2021 18:26

0 Şərh Baxış: 1 102

Dekabrın 4-də Azərbaycan Dövlət Akademik Opera və Balet Teatrında Azərbaycanın Xalq artisti, bəstəkar Tofiq Bakıxanovun 90 illik yubileyi münasibətilə "Xəzər balladası" və "Xeyir və Şər" baletlərinin tamaşası keçirilib.

Yubiley tədbirini giriş sözü ilə Azərbaycanın Əməkdar incəsənət xadimi, Bəstəkarlar İttifaqının katibi, professor, incəsənət üzrə fəlsəfə doktoru Zemfira Qafarova açmış və bəstəkarın yaradıcılıq yolu haqqında çıxış edib.

Tofiq Bakıxanov - Azərbaycanın Xalq artisti, professor, "Şöhrət" və "Şərəf" ordenli, "Humay" milli mükafatı laureatıdır. Bəstəkar 8 simfoniya, 5 simfonik muğam, 6 simfonik poema, müxtəlif musiqi alətləri üçün 25 konsert, 26 sonata, 3 birpərdəli balet, bəstəkar Nəriman Məmmədovla birlikdə qələmə aldığı 3 operetta, 100-dən artıq mahnının müəllifidir. O, Azərbaycanda tanınmış musiqiçilər nəslinin nümayəndəsidir. Onun atası Azərbaycanın Xalq artisti, tanınmış tar ifaçısı Əhməd Bakıxanov dahi Üzeyir Hacıbəylinin yaxın dostu olmuşdur. Onlar musiqi texnikumu və konsertlərdə birgə çalışıblar.

T.Bakıxanov hələ uşaq ikən Üz.Hacıbəyli onun ifasını dinləmiş və parlaq gələcəyi olduğunu qeyd etmişdi. Bu məqamı rəssam Hüseyn Hacıyev öz tablosunda təsvir etdib.

"Xəzər balladası" və "Xeyir və Şər" baletlərinin tamaşaları böyük müvəffəqiyyətlə baş tutmuş, tamaşaçılar yubilyarı və ifaçıları gurultulu alqışlarla yola salıblar.

Milli.Az