17:03
Aparılan monitorinqlər zamanı Ərəb ölkələrindən gəlmiş turistlərin Qax rayonunun Acınohur ərazisində mülkiyyətçinin razılığı əsasında istirahət məqsədilə çadır qurduqları və özlərinə məxsus şahin quşlarına təlim keçdikləri qeydə alınıb.
Ekoloji Təhlükəsizlik Xidmətinin rəisi Hikmət Əlizadə Trend-ə bildirib ki, təlimdə ev quşları olan göyərçinlərlə rəhmsiz rəftar olunması aşkar edildiyindən həmin şəxslərə qarşı İnzibati Xətalar Məcəlləsinin müvafiq maddəsi ilə cərimə tətbiq olunub.
---------
15:02
Sosial şəbəkələrdə Acınohur ərazisinə gələn ərəb turistlərlə bağlı paylaşım edilib.
Milli.Az İTV-yə istinadən xəbər verir ki, görüntülərdən bir neçə ərəb turist dronun arxasına canlı göyərçin bağlayaraq şahinlərə yem etdiyi aydın görünür. Onların bunu əyləncə üçün etdiyi iddia olunur.
Ekologiya və Təbii Sərvətlər Nazirliyi sosial şəbəkələrdə yayılan məsələyə münasibət bildirilib:
"Bizə məlumat daxil olub, qeyd edilənlərlə bağlı qanun pozuntusunun olub-olmaması, nə dərəcədə təhlükəliliyi və digər məsələlərlə aydınlıq gətiriləcək və ictimaiyyətə məlumat veriləcək. Ərazidə ETSN-in əməkdaşlarının olması, bu və ya digər dərəcədə pozuntuları görüb, göz yumması kimi faktlar təqdim olunarsa, bu məsələlər də tərəfimizdən obyektiv şəkildə araşdırılacaq".
Milli.Az