Zaminsiz kredit verən banklar – CƏDVƏL

Günümüzdə banklardan kredit əldə etmək çətinləşib. İş yerindən arayış, kredit tarixçəsi, əməkhaqqının minimum həddi, girov kimi vacib amillər qeydə alınır. Bunlardan biri də zamin tələbidir. Bəzi kreditlərdə, hətta 2 zamin belə tələb olunur.

Milli.Az xəbər verir ki, banco.az zaminsiz nağd pul krediti təklif edən bankları araşdırıb. Zaminsiz kreditlərə yalnız istehlak kreditləri aid olub.

Zaminsiz kredit verən banklar aşağıdakılardır:

"Bank Respublika" - minimum əməkhaqqı 400 manat olan şəxslərə kredit kartı təklif edir. Bu kartın üstünlüyü odur ki, əgər müştəri istifadə etdiyi kredit məbləğini 45 gün ərzində ödəyərsə, kreditə faiz hesablanmayacaq. Əgər kredit 45 gün ərzində ödənməzsə, borc faizi 27% olacaq. 

"Bank Silk Way" - bu bankın əməkhaqqı kartına sahib olan müştərilərə zaminsiz kredit verilir ki, bu zaman işçinin əmək təcrübəsi əsas götürülür. Məbləğ isə şəxsin əməkhaqqısına müvafiq olaraq hesablanır.

"Azərbaycan Beynəlxalq Bankı" - yalnız bu bankın əməkhaqqı kartlarına sahib olan şəxslərə zaminsiz kredit verir. Kredit məbləği maksimum əməkhaqqının 2 misli həcmində ola bilər.

"Dəmirbank" - minimum əməkhaqqı 800 manat olmalıdır.

"Kapital Bank" - birinci halda, bu bankın əməkhaqqı kartına sahib olan şəxslərə zaminsiz kredit verilir. İkinci halda isə, bu bankda əmanət yerləşdirən şəxslərə bu növ kredit təklif edilir.

"Unibank" - minimal əməkhaqqı 160 manat olmalıdır. Zaminsiz kreditlər üçün hərbçilər istisnadır.

"Yapı Kredi Bank" - zaminsiz kredit götürə biləcək şəxslər - dövlət işçiləri, müəllimlər, xarici və yerli neft, rabitə, telekommunikasiya, İT və s. şirkətlərində işləyən şəxslər, bank işçiləri, "Yapı Kredi Bank Azərbaycan"dan əməkhaqqı alan müştərilər.

Bu növ zaminsiz nağd pul kreditlərini əldə edərkən şəxsiyyət vəsiqəsi, iş yerindən arayış təqdim etmək lazımdır ki, bir çox hallarda da əməkhaqqının 6 və ya 12 aylıq çıxarışı tələb oluna bilər. Kredit mütəxəssisləri sizin gəlirlərinizi, xərclərinizi və kredit tarixçənizi analiz etdikdən sonra sizə zaminsiz kredit verə bilərlər.

Qeyd edək ki, "Bank of Baku" və "AccessBank"dan da zaminsiz kredit əldə etmək mümkündür. Lakin bu banklarda zamin tələbi hər bir müştəri üzrə ekspert tərəfindən fərdi şəkildə araşdırma aparıldıqdan sonra müəyyən edilir.

Milli.Az